jo tere husn mein narmi bhi bankpan bhi hai

jo tere husn meñ narmī bhī bāñkpan bhī hai

vo kaif-e-tāza bhī hai nashsha-e-kuhan bhī hai

mujhe to chain se rahne de ai dil-e-vahshī

ki dasht bhī hai tire sāmne chaman bhī hai

kahāñ kī manzil-e-maqsūd rāsta bhī nahīñ

safar meñ saath ḳhudā bhī hai ahrman bhī hai

vo ek lamha-e-parrāñ vo ek sā.at-e-dīd

hinā ba-dast bhī hai lāla-pairahan bhī hai

ba-chashm-e-shabnam-e-giryāñ agar koī dekhe

tirā libās hī ai gul tirā kafan bhī hai

vo ek gosha-e-dakan jise dakan kahiye

nigār shā.ir-e-badnām kā vatan bhī hai

jo tere husn mein narmi bhi bankpan bhi hai

wo kaif-e-taza bhi hai nashsha-e-kuhan bhi hai

mujhe to chain se rahne de ai dil-e-wahshi

ki dasht bhi hai tere samne chaman bhi hai

kahan ki manzil-e-maqsud rasta bhi nahin

safar mein sath KHuda bhi hai ahrman bhi hai

wo ek lamha-e-parran wo ek saat-e-did

hina ba-dast bhi hai lala-pairahan bhi hai

ba-chashm-e-shabnam-e-giryan agar koi dekhe

tera libas hi ai gul tera kafan bhi hai

wo ek gosha-e-dakan jise dakan kahiye

nigar shair-e-badnam ka watan bhi hai