jo tujh mein KHas tha sab mujh pe aam ho chuka hai

jo tujh meñ ḳhaas thā sab mujh pe aam ho chukā hai

ai zindagī tirā qissa tamām ho chukā hai

ai ruuh tere badan chhoḌne kā Dar kaisā

ik ek saañs kā jab intizām ho chukā hai

vo ham ġharīboñ se ab koī baat kaise kare

amīr-e-shahr se jo ham-kalām ho chukā hai

ab us se rakkheñ bhī kyā zindagī kī ham ummīd

vo jis kī zaat se jiinā harām ho chukā hai

ye TuuTe phūTe hue sher ab sunā.ūñ kise

ki jis ko dekho ġhazal kā imaam ho chukā hai

hamāre baad kī nasloñ ko kyā ġharaz is se

baḌoñ kā honā thā jo ehtirām ho chukā hai

phir is ke baad to aanī hai raat hī 'shāhid'

agar ye sach hai ki ab vaqt-e-shām ho chukā hai

jo tujh mein KHas tha sab mujh pe aam ho chuka hai

ai zindagi tera qissa tamam ho chuka hai

ai ruh tere badan chhoDne ka Dar kaisa

ek ek sans ka jab intizam ho chuka hai

wo hum gharibon se ab koi baat kaise kare

amir-e-shahr se jo ham-kalam ho chuka hai

ab us se rakkhen bhi kya zindagi ki hum ummid

wo jis ki zat se jina haram ho chuka hai

ye TuTe phuTe hue sher ab sunaun kise

ki jis ko dekho ghazal ka imam ho chuka hai

hamare baad ki naslon ko kya gharaz is se

baDon ka hona tha jo ehtiram ho chuka hai

phir is ke baad to aani hai raat hi 'shahid'

agar ye sach hai ki ab waqt-e-sham ho chuka hai