jo tum aao to phir jine ke saman ho bhi sakte hain

jo tum aao to phir jiine ke sāmāñ ho bhī sakte haiñ

rafū ye chāk-e-dāmān-o-garebāñ ho bhī sakte haiñ

vo āñkheñ pāsbāñ hoñ dil kī to dil kā patā kaisā

kahīñ gulchīñ nigahbān-e-gulistāñ ho bhī sakte haiñ

jinheñ ab tak na aaya hañs ke mauj-e-ġham ko Thukrānā

vo kam-himmat kisī din nazr-e-tūfāñ ho bhī sakte haiñ

zamāna muntazir hai ik na.e rang-e-haqīqat kā

ye afsāne kahīñ tārīḳh-e-insāñ ho bhī sakte haiñ

hamīñ par aam haiñ daur-e-vafā meñ un kī bedādeñ

hamīñ par ḳhatm saare ahd-o-paimāñ ho bhī sakte haiñ

jo be-maqsad tamannāoñ kā gahvāra rahā barsoñ

kahīñ is dil kī ābādī ke imkāñ ho bhī sakte haiñ

maiñ apnī dāstān-e-ġham ko kyā unvān duuñ 'azmat'

murattab dil ke aurāq-e-pareshāñ ho bhī sakte haiñ

jo tum aao to phir jine ke saman ho bhi sakte hain

rafu ye chaak-e-daman-o-gareban ho bhi sakte hain

wo aankhen pasban hon dil ki to dil ka pata kaisa

kahin gulchin nigahban-e-gulistan ho bhi sakte hain

jinhen ab tak na aaya hans ke mauj-e-gham ko Thukrana

wo kam-himmat kisi din nazr-e-tufan ho bhi sakte hain

zamana muntazir hai ek nae rang-e-haqiqat ka

ye afsane kahin tariKH-e-insan ho bhi sakte hain

hamin par aam hain daur-e-wafa mein un ki bedaden

hamin par KHatm sare ahd-o-paiman ho bhi sakte hain

jo be-maqsad tamannaon ka gahwara raha barson

kahin is dil ki aabaadi ke imkan ho bhi sakte hain

main apni dastan-e-gham ko kya unwan dun 'azmat'

murattab dil ke auraq-e-pareshan ho bhi sakte hain