jo tum aur subh aur gulnar-e-KHandan ho ke mil baiThe

jo tum aur sub.h aur gulnār-e-ḳhandāñ ho ke mil baiThe

to ham bhī un meñ bā-chāk-e-garebāñ ho ke mil baiThe

nahīñ khulte jo luuñ us shahd-lab se bosa-e-sānī

ye lab yuuñ bosa-e-avval meñ chaspāñ ho ke mil baiThe

uḌā duuñ dhajjiyāñ dil kī agar in meñ se koī bhī

qabā-e-surḳh meñ terī garebāñ ho ke mil baiThe

ye juzv-e-ham-digar haiñ ai kamāñ-abrū ojab mat kar

jo dil tere sar-e-nāvak pe paikāñ ho ke mil baiThe

abhī dil jam.a hai ai shāna kar jaldī surāġh is kā

mabād us zulf-e-mushkīñ meñ pareshāñ ho ke mil baiThe

sunā ai tifl jab muzhda tirī maktab-nashīnī kā

ye ajzā-e-dil-e-sīpāra qur.āñ ho ke mil baiThe

hamārā rashk se dil jal ke ḳhākistar ho yā qismat

aur in dāmoñ meñ missī zeb-e-dandāñ ho ke mil baiThe

ye vo majma.a nahīñ nāseh jahāñ ho daḳhl daanā ko

magar tujh sā koī makkār nādāñ ho ke mil baiThe

ye insāñ zā parī-vash aise dilkash haiñ ki be-vahshat

parī aave agar in meñ to insāñ ho ke mil baiThe

ye atfāl-e-hasīñ āshiq kā jī lene meñ shaitāñ haiñ

jiye āshiq vahī un meñ jo shaitāñ ho ke mil baiThe

'baqā' ham gabr-e-nā-muslim the par aa kar ba-nā-chārī

vo muslim-zāda tifloñ meñ musalmāñ ho ke mil baiThe

jo tum aur subh aur gulnar-e-KHandan ho ke mil baiThe

to hum bhi un mein ba-chaak-e-gareban ho ke mil baiThe

nahin khulte jo lun us shahd-lab se bosa-e-sani

ye lab yun bosa-e-awwal mein chaspan ho ke mil baiThe

uDa dun dhajjiyan dil ki agar in mein se koi bhi

qaba-e-surKH mein teri gareban ho ke mil baiThe

ye juzw-e-ham-digar hain ai kaman-abru ojab mat kar

jo dil tere sar-e-nawak pe paikan ho ke mil baiThe

abhi dil jama hai ai shana kar jaldi suragh is ka

mabaad us zulf-e-mushkin mein pareshan ho ke mil baiThe

suna ai tifl jab muzhda teri maktab-nashini ka

ye ajza-e-dil-e-sipara quran ho ke mil baiThe

hamara rashk se dil jal ke KHakistar ho ya qismat

aur in damon mein missi zeb-e-dandan ho ke mil baiThe

ye wo majma nahin naseh jahan ho daKHl dana ko

magar tujh sa koi makkar nadan ho ke mil baiThe

ye insan za pari-wash aise dilkash hain ki be-wahshat

pari aawe agar in mein to insan ho ke mil baiThe

ye atfal-e-hasin aashiq ka ji lene mein shaitan hain

jiye aashiq wahi un mein jo shaitan ho ke mil baiThe

'baqa' hum gabr-e-na-muslim the par aa kar ba-na-chaari

wo muslim-zada tiflon mein musalman ho ke mil baiThe