jo ye kahun to qanaat pe harf aata hai

jo ye kahūñ to qanā.at pe harf aatā hai

charāġh ḳhud nahīñ jaltā jalāyā jaatā hai

vo aadmī jo zamāne se dil lagātā hai

qadam qadam pe fareb-e-hayāt khātā hai

hayāt-e-ishq meñ vo manzileñ bhī aatī haiñ

jahāñ pe maslahatan muskurāyā jaatā hai

chaman meñ ḳhaar kī sūrat agar rahā bhī to kyā

vo phūlban jo chaman ko chaman banātā hai

kalī kī dil-shikanī rang lā ke rahtī hai

guloñ meñ khelne vaalā ye bhuul jaatā hai

ye jāntā hai ki bijlī jalā ke chhoḌegī

banāne vaalā magar āshiyāñ banātā hai

hayāt jehd-e-musalsal kā naam hai yaaro

nasīb ḳhud nahīñ bantā banāyā jaatā hai

sanam-kade meñ bhī dekhā hai in nigāhoñ ne

ḳhudā ko DhūñDne vaalā ḳhudā ko paatā hai

ajiib baat hai unvāñ badal badal ke 'nihāl'

zamāna mujh ko fasāne mire sunātā hai

jo ye kahun to qanaat pe harf aata hai

charagh KHud nahin jalta jalaya jata hai

wo aadmi jo zamane se dil lagata hai

qadam qadam pe fareb-e-hayat khata hai

hayat-e-ishq mein wo manzilen bhi aati hain

jahan pe maslahatan muskuraya jata hai

chaman mein KHar ki surat agar raha bhi to kya

wo phulban jo chaman ko chaman banata hai

kali ki dil-shikani rang la ke rahti hai

gulon mein khelne wala ye bhul jata hai

ye jaanta hai ki bijli jala ke chhoDegi

banane wala magar aashiyan banata hai

hayat jehd-e-musalsal ka nam hai yaro

nasib KHud nahin banta banaya jata hai

sanam-kade mein bhi dekha hai in nigahon ne

KHuda ko DhunDne wala KHuda ko pata hai

ajib baat hai unwan badal badal ke 'nihaal'

zamana mujh ko fasane mere sunata hai