jo zindagi bachi hai use Khaar kya karen

jo zindagī bachī hai use ḳhaar kyā kareñ

ham bhī tumhāre hote magar yaar kyā kareñ

haiñ band sab dukāneñ ki bāzār-e-ishq meñ

miltā nahīñ hai ham sā ḳharīdār kyā kareñ

laḌte rahe havā se jalāte rahe charāġh

ab aur raushnī ke talabgār kyā kareñ

ahbāb chal diye tire darbār kī taraf

aur ham ki aa ga.e haiñ sar-e-dār kyā kareñ

sīdhī sī baat ye hai hameñ tum se pyaar hai

sheroñ meñ is ḳhayāl kī takrār kyā kareñ

ham jaan de chuke haiñ ka.ī baar ishq meñ

ab ye batāo 'shād' ki is baar kyā kareñ

jo zindagi bachi hai use KHar kya karen

hum bhi tumhaare hote magar yar kya karen

hain band sab dukanen ki bazar-e-ishq mein

milta nahin hai hum sa KHaridar kya karen

laDte rahe hawa se jalate rahe charagh

ab aur raushni ke talabgar kya karen

ahbab chal diye tere darbar ki taraf

aur hum ki aa gae hain sar-e-dar kya karen

sidhi si baat ye hai hamein tum se pyar hai

sheron mein is KHayal ki takrar kya karen

hum jaan de chuke hain kai bar ishq mein

ab ye batao 'shad' ki is bar kya karen