jo zindagi ke sab se hasin moD par mila

jo zindagī ke sab se hasīñ moḌ par milā

vo shaḳhs phir na mujh ko kabhī umr-bhar milā

ġham kī har ik kitāb meñ thā darj merā naam

rakkhā huā maiñ har dar-o-dīvār par milā

talvār kī tarah thī havā tez raah meñ

pattā bachā na ek bhī sābit shajar milā

lākhoñ kā qatl kar ke bhī vo mutma.in na thā

āḳhir vo apne ḳhuuñ meñ mujhe tar-ba-tar milā

tū haal zindagī kā mirī jaan jā.egā

bas ek baar merī nazar se nazar milā

har ek phuul par thī tire āñsūoñ kī os

qatra mire lahū kā har ik shāḳh par milā

jo zindagi ke sab se hasin moD par mila

wo shaKHs phir na mujh ko kabhi umr-bhar mila

gham ki har ek kitab mein tha darj mera nam

rakkha hua main har dar-o-diwar par mila

talwar ki tarah thi hawa tez rah mein

patta bacha na ek bhi sabit shajar mila

lakhon ka qatl kar ke bhi wo mutmain na tha

aaKHir wo apne KHun mein mujhe tar-ba-tar mila

tu haal zindagi ka meri jaan jaega

bas ek bar meri nazar se nazar mila

har ek phul par thi tere aansuon ki os

qatra mere lahu ka har ek shaKH par mila