johd-e-safar mein saya-e-mehr-o-wafa rahe

johd-e-safar meñ sāya-e-mehr-o-vafā rahe

vo dost hī rahe na vo dard-āshnā rahe

ham bhī sharīk-e-qāfila-e-shauq the magar

ham hī rahīn-e-minnat-e-dast-e-sila rahe

ik umr kī rifāqat-e-paiham ke bāvajūd

ham un se duur aur vo ham se judā rahe

ye be-ruḳhī ye tark-e-ta.alluq ke silsile

kuchh to lihāz-e-rishta-e-ahd-e-vafā rahe

ye shahr-e-āfiyat bhī hai aur kū-e-yār bhī

ai dil ḳhayāl-e-ḳhātir-e-ahl-e-jafā rahe

vo qissa-e-junūñ vo fareb-e-shabāb-e-ḳhām

ab yaad bhī nahīñ hai magar yaad sā rahe

vo fikr-e-jān-o-tan hai ki kuchh sūjhtā nahīñ

ik marg-e-ārzū hai ki sub.h-o-masā rahe

johd-e-safar mein saya-e-mehr-o-wafa rahe

wo dost hi rahe na wo dard-ashna rahe

hum bhi sharik-e-qafila-e-shauq the magar

hum hi rahin-e-minnat-e-dast-e-sila rahe

ek umr ki rifaqat-e-paiham ke bawajud

hum un se dur aur wo hum se juda rahe

ye be-ruKHi ye tark-e-talluq ke silsile

kuchh to lihaz-e-rishta-e-ahd-e-wafa rahe

ye shahr-e-afiyat bhi hai aur ku-e-yar bhi

ai dil KHayal-e-KHatir-e-ahl-e-jafa rahe

wo qissa-e-junun wo fareb-e-shabab-e-KHam

ab yaad bhi nahin hai magar yaad sa rahe

wo fikr-e-jaan-o-tan hai ki kuchh sujhta nahin

ek marg-e-arzu hai ki subh-o-masa rahe