josh-e-girya ye dam-e-ruKHsat-e-yar aae nazar

josh-e-girya ye dam-e-ruḳhsat-e-yār aa.e nazar

abr-e-joshāñ kā bañdhā jaise ki taar aa.e nazar

rañg-e-gulzār jahāñ garche hazār aa.e nazar

chain par dil ko kahāñ taaki na yaar aa.e nazar

apnā jab kū-e-tasavvur meñ guzār aa.e nazar

jis taraf dekheñ udhar sūrat-e-yār aa.e nazar

huuñ maiñ kis ġhairat-e-gulzār kā zaḳhmī ki mire

har bun-e-mū pe gul-e-zaḳhm hazār aa.e nazar

bin paḌhe phaaḌ ke ḳhat rakh de jo vo rauzan meñ

juuñ qalam siina mirā kyuuñ na figār aa.e nazar

ham-suḳhan jis se na ho sakiye phir us shoḳh se aah!

aur kuchh baat kā kab dār-o-madār aa.e nazar

ho jahāñ jumbish-e-lab kā bhī na yaarā ai vaa.e

muñh kahāñ ye ki jo vaañ bos-o-kanār aa.e nazar

ham dil-afroḳhta vaañ juuñ sharar-e-sañg haiñ aah

na jahāñ paik-e-sabā kā bhī guzār aa.e nazar

sar-bulandī jinheñ de charḳh na de chain unheñ

ki ba-gardish mah-o-ḳhur lail-o-nahār aa.e nazar

jab ki har roz kaTīñ va.ade pe ghaḌiyāñ ginte

kyuuñ na har din hameñ phir roz-e-shumār aa.e nazar

us ke mahram pe bhabūkā sī jo dekhūñ chiḌiyā

kyuuñ na juuñ tā.ir-e-sīmāb qarār aa.e nazar

ho ba-sad-rañg shagufta lab-e-dariyā pe vo baaġh

har ravish jis meñ ki bas lutf-e-hazār aa.e nazar

chaar sū naġhma-sarā.ī meñ hoñ murġhān-e-chaman

shāḳh-dar-shāḳh ajā.ib gul-o-bār aa.e nazar

mauj-e-dariyā idhar aTkhelī kī chāleñ dikhlā.e

aur udhar raqs-kunāñ bād-e-bahār aa.e nazar

hove atrāf se ghanghor ghaTā ghir aa.ī

kauñd bijlī kī ho aur paḌtī phuvār aa.e nazar

ik taraf mor muñDeroñ pe kareñ kyā kyā shor

ik taraf abr meñ bagloñ kī qatār aa.e nazar

gardish-e-jām ho juuñ gardish-e-chashmān-e-butāñ

haath meñ mutrib-e-sar-ḳhush ke sitār aa.e nazar

lab-ba-lab sīna-ba-sīna jise chāheñ vo ho

gulshan-e-zīst kī tab ham ko bahār aa.e nazar

āshiqāna ġhazal ab paḌh koī 'jur.at' tah-dār

ma.anī-e-tāza bhī tā yāroñ ko yaar aa.e nazar

josh-e-girya ye dam-e-ruKHsat-e-yar aae nazar

abr-e-joshan ka bandha jaise ki tar aae nazar

rang-e-gulzar jahan garche hazar aae nazar

chain par dil ko kahan taki na yar aae nazar

apna jab ku-e-tasawwur mein guzar aae nazar

jis taraf dekhen udhar surat-e-yar aae nazar

hun main kis ghairat-e-gulzar ka zaKHmi ki mere

har bun-e-mu pe gul-e-zaKHm hazar aae nazar

bin paDhe phaD ke KHat rakh de jo wo rauzan mein

jun qalam sina mera kyun na figar aae nazar

ham-suKHan jis se na ho sakiye phir us shoKH se aah!

aur kuchh baat ka kab dar-o-madar aae nazar

ho jahan jumbish-e-lab ka bhi na yara ai wae

munh kahan ye ki jo wan bos-o-kanar aae nazar

hum dil-afroKHta wan jun sharar-e-sang hain aah

na jahan paik-e-saba ka bhi guzar aae nazar

sar-bulandi jinhen de charKH na de chain unhen

ki ba-gardish mah-o-KHur lail-o-nahaar aae nazar

jab ki har roz kaTin wade pe ghaDiyan ginte

kyun na har din hamein phir roz-e-shumar aae nazar

us ke mahram pe bhabuka si jo dekhun chiDiya

kyun na jun tair-e-simab qarar aae nazar

ho ba-sad-rang shagufta lab-e-dariya pe wo bagh

har rawish jis mein ki bas lutf-e-hazar aae nazar

chaar su naghma-sarai mein hon murghan-e-chaman

shaKH-dar-shaKH ajaib gul-o-bar aae nazar

mauj-e-dariya idhar aTkheli ki chaalen dikhlae

aur udhar raqs-kunan baad-e-bahaar aae nazar

howe atraf se ghanghor ghaTa ghir aai

kaund bijli ki ho aur paDti phuwar aae nazar

ek taraf mor munDeron pe karen kya kya shor

ek taraf abr mein baglon ki qatar aae nazar

gardish-e-jam ho jun gardish-e-chashman-e-butan

hath mein mutrib-e-sar-KHush ke sitar aae nazar

lab-ba-lab sina-ba-sina jise chahen wo ho

gulshan-e-zist ki tab hum ko bahaar aae nazar

aashiqana ghazal ab paDh koi 'jurat' tah-dar

mani-e-taza bhi ta yaron ko yar aae nazar