juD jaen tasawir to ban jae kahani

juḌ jaa.eñ tasāvīr to ban jaa.e kahānī

lamhāt ikaTThe hoñ to kahlā.e kahānī

marnā hī haqīqat hai to phir zindagī kyā hai

ye dhuup kī shiddat ye ghane saa.e kahānī

sab camere taqdīr kī jānib hī muḌe haiñ

koī mirī mehnat pe bhī filmā.e kahānī

ik dā.ere meñ ghūmtī hai soī ghaḌī kī

har baar zamāna vahī dohrā.e kahānī

ham se to ye hālāt kī parteñ nahīñ khultīñ

har ek kahānī meñ nazar aa.e kahānī

kahte haiñ tag-o-dau meñ madad kartā hai rab ḳhud

haare hue kirdār ko jitvā.e kahānī

manzar kī tarañgoñ meñ vo gahrā.ī hai 'zīshān'

mujh ko to har ik aks nazar aa.e kahānī

juD jaen tasawir to ban jae kahani

lamhat ikaTThe hon to kahlae kahani

marna hi haqiqat hai to phir zindagi kya hai

ye dhup ki shiddat ye ghane sae kahani

sab camere taqdir ki jaanib hi muDe hain

koi meri mehnat pe bhi filmae kahani

ek daere mein ghumti hai soi ghaDi ki

har bar zamana wahi dohrae kahani

hum se to ye haalat ki parten nahin khultin

har ek kahani mein nazar aae kahani

kahte hain tag-o-dau mein madad karta hai rab KHud

haare hue kirdar ko jitwae kahani

manzar ki tarangon mein wo gahrai hai 'zishan'

mujh ko to har ek aks nazar aae kahani