juda bhi ho ke wo ek pal kabhi juda na hua

judā bhī ho ke vo ik pal kabhī judā na huā

ye aur baat ki dekhe use zamāna huā

na pūchh merā pata mauja-e-havā huuñ maiñ

bhalā havā kā bhī koī kabhī Thikāna huā

har ek samt sahīfe khule paḌe the yahāñ

tirā nasīb ki tū harf-āshnā na huā

panāh miltī kise merī kibriyā.ī se

ḳhudā kā shukr maiñ banda huā ḳhudā na huā

is apnī khoj meñ kyā kyā khule na bhed magar

maiñ huuñ bhī yā ki nahīñ mujh pe aa.ina na huā

nidā-e-ġhaib thī terī sadā thī dhaḌkan thī

mire shu.ūr se itnā bhī faisla na huā

shajar to raah kā saaya haiñ un ko kyā mālūm

kahāñ se aayā musāfir kidhar ravāna huā

faqīr ho ke liyā tū ne kyā 'bashīr' ki jab

galīm-posh bhī tū ho ke bā-safā na huā

juda bhi ho ke wo ek pal kabhi juda na hua

ye aur baat ki dekhe use zamana hua

na puchh mera pata mauja-e-hawa hun main

bhala hawa ka bhi koi kabhi Thikana hua

har ek samt sahife khule paDe the yahan

tera nasib ki tu harf-ashna na hua

panah milti kise meri kibriyai se

KHuda ka shukr main banda hua KHuda na hua

is apni khoj mein kya kya khule na bhed magar

main hun bhi ya ki nahin mujh pe aaina na hua

nida-e-ghaib thi teri sada thi dhaDkan thi

mere shuur se itna bhi faisla na hua

shajar to rah ka saya hain un ko kya malum

kahan se aaya musafir kidhar rawana hua

faqir ho ke liya tu ne kya 'bashir' ki jab

galim-posh bhi tu ho ke ba-safa na hua