juda ho kar wo humse hai juda kya

judā ho kar vo ham se hai judā kyā

samā.at kā sadā se fāsla kyā

ḳhud apne ālam-e-hairat ko dekhe

tirā muñh tak rahā hai aa.inā kyā

añdherā ho gayā hai shahr bhar meñ

koī dil jalte jalte bujh gayā kyā

lahū kī koī qīmat hī nahīñ hai

tire rañg-e-hinā kā ḳhuuñ bahā kyā

charāġhoñ kī safeñ suunī paḌī haiñ

hamāre ba.ad mahfil meñ rahā kyā

diloñ meñ bhī utāro koī mahtāb

zamīñ par khīñchte ho dā.era kyā

diyā apnā bujhā do ḳhud hī 'shā.er'

havā-e-nīm-shab kā aasrā kyā

juda ho kar wo hum se hai juda kya

samaat ka sada se fasla kya

KHud apne aalam-e-hairat ko dekhe

tera munh tak raha hai aaina kya

andhera ho gaya hai shahr bhar mein

koi dil jalte jalte bujh gaya kya

lahu ki koi qimat hi nahin hai

tere rang-e-hina ka KHun baha kya

charaghon ki safen suni paDi hain

hamare baad mahfil mein raha kya

dilon mein bhi utaro koi mahtab

zamin par khinchte ho daera kya

diya apna bujha do KHud hi 'shaer'

hawa-e-nim-shab ka aasra kya