juda ho ke wo pachhtaya nahin tha

judā ho ke vo pachhtāyā nahīñ thā

tasavvur meñ mujhe laayā nahīñ thā

chaman ujḌā thā mere dil kā aise

ki koī sar pe bhī saayā nahīñ thā

mile the mujh ko apnoñ se vo aañsū

kabhī kuchh ġhair se paayā nahīñ thā

koī mujh se bhī kyā kuchh chhīn letā

ba-juz dil koī sarmāya nahīñ thā

koī ḳhushbū na aa.ī saath mere

hinā ne bhī to mahkāyā nahīñ thā

jalā rakkhe the dīpak aas ke bhī

vo vā'da kar ke ghar aayā nahīñ thā

kashish kuchh husn kī us ko nahīñ thī

ye jaadū us pe chal paayā nahīñ thā

mire bistar pe the yādoñ ke kāñTe

kabhī phūloñ se mahkāyā nahīñ thā

mohabbat meñ agar maiñ nā-samajh thī

kabhī us ne bhī samjhāyā nahīñ thā

vo kaisā ham-safar niklā jo mere

kabhī bhī saath chal paayā nahīñ thā

maiñ aisā aa.ina thī jis meñ 'nainā'

koī chehra nazar aayā nahīñ thā

juda ho ke wo pachhtaya nahin tha

tasawwur mein mujhe laya nahin tha

chaman ujDa tha mere dil ka aise

ki koi sar pe bhi saya nahin tha

mile the mujh ko apnon se wo aansu

kabhi kuchh ghair se paya nahin tha

koi mujh se bhi kya kuchh chhin leta

ba-juz dil koi sarmaya nahin tha

koi KHushbu na aai sath mere

hina ne bhi to mahkaya nahin tha

jala rakkhe the dipak aas ke bhi

wo wa'da kar ke ghar aaya nahin tha

kashish kuchh husn ki us ko nahin thi

ye jadu us pe chal paya nahin tha

mere bistar pe the yaadon ke kanTe

kabhi phulon se mahkaya nahin tha

mohabbat mein agar main na-samajh thi

kabhi us ne bhi samjhaya nahin tha

wo kaisa ham-safar nikla jo mere

kabhi bhi sath chal paya nahin tha

main aisa aaina thi jis mein 'naina'

koi chehra nazar aaya nahin tha