judaiyon ke tasawwur hi se rulaun use

judā.iyoñ ke tasavvur hī se rulā.ūñ use

maiñ jhūT-mūT kā qissa koī sunā.ūñ use

use yaqīn hai kitnā mirī vafāoñ kā

ḳhilāf apne kisī roz varġhalā.ūñ use

vo taptī dhuup meñ bhī saath mere aa.egā

magar maiñ chāñdnī-rātoñ meñ āzmā.ūñ use

ġhamoñ ke sahrā meñ phirtā rahūñ use le kar

udāsiyoñ ke samundar meñ saath lā.ūñ use

maza to jab hai use bhiiḌ meñ kahīñ kho duuñ

phir us ke ba.ad kahīñ se maiñ DhūñD lā.ūñ use

ye kyā ki roz vahī soch par musallat ho

kabhī to aisā ho kuchh der bhuul jā.ūñ use

kuchh aur ḳhvāb bhī us se chhupā ke dekhe haiñ

kuchh aur chehre nigāhoñ meñ haiñ dikhā.ūñ use

vo giilī miTTī kī mānind hai magar 'hāmid'

zarūrī kyā hai ki apnā hī sā banā.ūñ use

judaiyon ke tasawwur hi se rulaun use

main jhuT-muT ka qissa koi sunaun use

use yaqin hai kitna meri wafaon ka

KHilaf apne kisi roz warghalaun use

wo tapti dhup mein bhi sath mere aaega

magar main chandni-raaton mein aazmaun use

ghamon ke sahra mein phirta rahun use le kar

udasiyon ke samundar mein sath laun use

maza to jab hai use bhiD mein kahin kho dun

phir us ke baad kahin se main DhunD laun use

ye kya ki roz wahi soch par musallat ho

kabhi to aisa ho kuchh der bhul jaun use

kuchh aur KHwab bhi us se chhupa ke dekhe hain

kuchh aur chehre nigahon mein hain dikhaun use

wo gili miTTi ki manind hai magar 'hamid'

zaruri kya hai ki apna hi sa banaun use