junun ba-KHair har aafat se kaamran nikle

junūñ ba-ḳhair har aafat se kāmrāñ nikle

talāsh-e-manzil-e-jānāñ meñ ham jahāñ nikle

ham aa ga.e rasan-o-dār tak mohabbat meñ

tumhāre qaul faqat zeb-e-dāstāñ nikle

sitam-shi.āroñ ne har ik sitam ke baad kahā

hamāre dil ke abhī hausle kahāñ nikle

nikalnā un kā sajā kar vo maañg meñ afshāñ

ki jaise shab meñ sitāroñ kā kārvāñ nikle

na jaane kaun sī tāqat thī jis ne rok diyā

junūñ kī raah meñ ham jab bhī nā-gahāñ nikle

mirī tabāhī kā afsāna ban ga.e hamdam

vo bāl-o-par jo pas-e-shāḳh-e-āshiyāñ nikle

lagā ke ḳhāna-e-'hasrat' meñ aag kahte haiñ

is aag se na kabhī dekhnā dhuāñ nikle

junun ba-KHair har aafat se kaamran nikle

talash-e-manzil-e-jaanan mein hum jahan nikle

hum aa gae rasan-o-dar tak mohabbat mein

tumhaare qaul faqat zeb-e-dastan nikle

sitam-shiaron ne har ek sitam ke baad kaha

hamare dil ke abhi hausle kahan nikle

nikalna un ka saja kar wo mang mein afshan

ki jaise shab mein sitaron ka karwan nikle

na jaane kaun si taqat thi jis ne rok diya

junun ki rah mein hum jab bhi na-gahan nikle

meri tabahi ka afsana ban gae hamdam

wo baal-o-par jo pas-e-shaKH-e-ashiyan nikle

laga ke KHana-e-'hasrat' mein aag kahte hain

is aag se na kabhi dekhna dhuan nikle