junun-e-ishq ka jo kuchh hua anjam kya kahiye

junūn-e-ishq kā jo kuchh huā anjām kyā kahiye

kisī se ab ye rūdād-e-dil-e-nākām kyā kahiye

phirī kyuuñ kar nigāh-e-sāqī-e-gulfām kyā kahiye

bharī mahfil meñ asbāb-e-shikast-e-jām kyā kahiye

ye kaisī dil meñ hai ik zulmat-e-be-nām kyā kahiye

bujhā kyuuñ daf.atan az-ḳhud charāġh-e-shām kyā kahiye

taġhāful par vo do harf-e-shikāyat bhī qayāmat the

zamāne bhar ke ham par aa ga.e ilzām kyā kahiye

mirā dard-e-nihāñ bhī aaj rusvā-e-zamāna hai

ik āh-e-zer-e-lab bhī ban ga.ī dushnām kyā kahiye

dar-o-dīvār par chhā.e hue haiñ yaas ke manzar

dayār-e-nāmurādī ke ye sub.h-o-shām kyā kahiye

jahān-e-ārzū bhī rafta rafta ho chalā vīrāñ

ik āġhāz-e-hasīñ kā aah ye anjām kyā kahiye

umīd-o-yās meñ ye roz-o-shab kī kashmakash tauba

ba-har-lamha fareb-e-gardish-e-ayyām kyā kahiye

ye kis ke dar se ta.ane mil rahe haiñ sajda-o-sar ko

ye kis dar par hai zauq-e-bandagī badnām kyā kahiye

kahāñ kā shikva-e-ġham ham to bas shukr-e-sitam karte

magar shukr-e-sitam kā bhī hai jo anjām kyā kahiye

adā-e-bad-gumānī bhī sarisht-e-ishq hai lekin

ye kyuuñ kar ban ga.ī minjumla-e-ilzām kyā kahiye

raheñge hashr tak mamnūn-e-ehsān-e-dil-āzārī

ḳhulūs-e-ishq par ye qīmtī in.aam kyā kahiye

baḌhī jaatī hai ab to aur bhī kuchh dūrī-e-manzil

achānak nau-ba-nau-dushvārī-har-gām kyā kahiye

vo apnī sa.ī-e-tajdīd-e-junūñ bhī rā.egāñ Thahrī

bas ab aage ma.āl-e-hasrat-e-nākām kyā kahiye

na samjhe aaj tak rañg-e-mizāj-e-yār-e-be-parvā

magar phir bhī zabāñ par hai usī kā naam kyā kahiye

junun-e-ishq ka jo kuchh hua anjam kya kahiye

kisi se ab ye rudad-e-dil-e-nakaam kya kahiye

phiri kyun kar nigah-e-saqi-e-gulfam kya kahiye

bhari mahfil mein asbab-e-shikast-e-jam kya kahiye

ye kaisi dil mein hai ek zulmat-e-be-nam kya kahiye

bujha kyun dafatan az-KHud charagh-e-sham kya kahiye

taghaful par wo do harf-e-shikayat bhi qayamat the

zamane bhar ke hum par aa gae ilzam kya kahiye

mera dard-e-nihan bhi aaj ruswa-e-zamana hai

ek aah-e-zer-e-lab bhi ban gai dushnam kya kahiye

dar-o-diwar par chhae hue hain yas ke manzar

dayar-e-namuradi ke ye subh-o-sham kya kahiye

jahan-e-arzu bhi rafta rafta ho chala viran

ek aaghaz-e-hasin ka aah ye anjam kya kahiye

umid-o-yas mein ye roz-o-shab ki kashmakash tauba

ba-har-lamha fareb-e-gardish-e-ayyam kya kahiye

ye kis ke dar se tane mil rahe hain sajda-o-sar ko

ye kis dar par hai zauq-e-bandagi badnam kya kahiye

kahan ka shikwa-e-gham hum to bas shukr-e-sitam karte

magar shukr-e-sitam ka bhi hai jo anjam kya kahiye

ada-e-bad-gumani bhi sarisht-e-ishq hai lekin

ye kyun kar ban gai minjumla-e-ilzam kya kahiye

rahenge hashr tak mamnun-e-ehsan-e-dil-azari

KHulus-e-ishq par ye qimti inam kya kahiye

baDhi jati hai ab to aur bhi kuchh duri-e-manzil

achanak nau-ba-nau-dushwari-har-gam kya kahiye

wo apni sai-e-tajdid-e-junun bhi raegan Thahri

bas ab aage maal-e-hasrat-e-nakaam kya kahiye

na samjhe aaj tak rang-e-mizaj-e-yar-e-be-parwa

magar phir bhi zaban par hai usi ka nam kya kahiye