junun-e-ishq ki ye fitna-samani nahin jati

junūn-e-ishq kī ye fitna-sāmānī nahīñ jaatī

nahīñ jaatī hamārī chāk-dāmānī nahīñ jaatī

musībat yuuñ kabhī duniyā meñ pahchānī nahīñ jaatī

nahīñ aatī balā jo sar pe vo maanī nahīñ jaatī

gumān-e-bad na kar ai mohtasib rindoñ kī hālat par

ki ho kar chāk-dāman pāk-dāmānī nahīñ jaatī

nahīñ martā kabhī go bul-havas har ik pe martā hai

nahīñ jaatī subuk-sar kī girāñ-jānī nahīñ jaatī

ziyāda duur sāhil to nahīñ kuchh bahr-e-hastī kā

magar kashtī kidhar jaa.e ki tuġhyānī nahīñ jaatī

hamāre ghar kī vīrānī se hai dil bastagī us ko

tum aa kar jab chale jaate ho vīrānī nahīñ jaatī

tamāshā dekhne vaale to lākhoñ aate jaate haiñ

vahī jalve haiñ jalvoñ kī farāvānī nahīñ jaatī

tirī tasvīr ā.īna hai merī chashm-e-hairat kā

nahīñ jaatī in ā.īnoñ kī hairānī nahīñ jaatī

abhī nazroñ meñ phirtā hai vo bazm-e-nāz kā manzar

mire dil se tire jalvoñ kī arzānī nahīñ jaatī

hijābāt-e-jahāñ se har adā chhan chhan kī aatī hai

ġharaz parde se un kī jalva-sāmānī nahīñ jaatī

mujhe samjhā rahe haiñ aap kyā ai nāseh-e-mushfiq

mohabbat meñ kisī kī baat hī maanī nahīñ jaatī

rahegā shā'irī kā naam 'ḳhushtar' rahtī duniyā tak

suḳhan-jūī suḳhan-goī suḳhan-dānī nahīñ jaatī

junun-e-ishq ki ye fitna-samani nahin jati

nahin jati hamari chaak-damani nahin jati

musibat yun kabhi duniya mein pahchani nahin jati

nahin aati bala jo sar pe wo mani nahin jati

guman-e-bad na kar ai mohtasib rindon ki haalat par

ki ho kar chaak-daman pak-damani nahin jati

nahin marta kabhi go bul-hawas har ek pe marta hai

nahin jati subuk-sar ki giran-jaani nahin jati

ziyaada dur sahil to nahin kuchh bahr-e-hasti ka

magar kashti kidhar jae ki tughyani nahin jati

hamare ghar ki virani se hai dil bastagi us ko

tum aa kar jab chale jate ho virani nahin jati

tamasha dekhne wale to lakhon aate jate hain

wahi jalwe hain jalwon ki farawani nahin jati

teri taswir aaina hai meri chashm-e-hairat ka

nahin jati in aainon ki hairani nahin jati

abhi nazron mein phirta hai wo bazm-e-naz ka manzar

mere dil se tere jalwon ki arzani nahin jati

hijabaat-e-jahan se har ada chhan chhan ki aati hai

gharaz parde se un ki jalwa-samani nahin jati

mujhe samjha rahe hain aap kya ai naseh-e-mushfiq

mohabbat mein kisi ki baat hi mani nahin jati

rahega sha'iri ka nam 'KHushtar' rahti duniya tak

suKHan-jui suKHan-goi suKHan-dani nahin jati