junun ka raqs bhi kab tak karunga

junūñ kā raqs bhī kab tak karūñgā

kahīñ maiñ bhī Thikāne jā lagūñgā

huā jaatā hai tan ye bojh mujh par

magar ye dukh bhī ab kis se kahūñgā

bhulā duuñ kyoñ na maiñ is chup ko āḳhir

zarā se zaḳhm ko kitnā karūñgā

ḳhudā ke rañg bhī sab khul ga.e haiñ

gunāh apne bhī maiñ kyūñkar ginūñgā

tirī ḳhāmoshiyoñ kī dhuup meñ bhī

tirī āvāz meñ bhīgā rahūñgā

abhī be-bāt kitnā hañs rahā huuñ

nikal kar bazm se girya karūñgā

nahīñ va.ada nahīñ hogā koī ab

bahut hogā to bas zinda rahūñgā

junun ka raqs bhi kab tak karunga

kahin main bhi Thikane ja lagunga

hua jata hai tan ye bojh mujh par

magar ye dukh bhi ab kis se kahunga

bhula dun kyon na main is chup ko aaKHir

zara se zaKHm ko kitna karunga

KHuda ke rang bhi sab khul gae hain

gunah apne bhi main kyunkar ginunga

teri KHamoshiyon ki dhup mein bhi

teri aawaz mein bhiga rahunga

abhi be-baat kitna hans raha hun

nikal kar bazm se girya karunga

nahin wada nahin hoga koi ab

bahut hoga to bas zinda rahunga