junun ke ahd mein aawara ku-ba-ku hona

junūñ ke ahd meñ āvāra kū-ba-kū honā

baġhair mushk ke sāñsoñ kā mushk-bū honā

usī ne chāhā nigāhoñ ke rū-ba-rū honā

vagarna sahl na thā us se guftugū honā

abā qabā ke liye to ye baat mumkin hai

jigar ke chaak kā mumkin nahīñ rafū honā

na jaane kab se hai hairat-zada banā.e hue

us ek sū kā nigāhoñ meñ chaar sū honā

tulūa honā ufuq par mah-e-visāl sā kuchh

tire badan kā sar-e-shām rañg-o-bū honā

jahāñ jahāñ se nikal kar ye barq girtī hai

vahāñ vahāñ hai ye chāk-e-falak rafū honā

thakan malāl udāsī safar kī nākāmī

ye ho qubūl to sargarm-e-justujū honā

maiñ apnā ḳhuun diye jā rahā huuñ duniyā ko

ab is ke baad shafaq ko hai suraḳh-rū honā

shab-e-firāq ne āsān kar diyā 'iqbāl'

hamāre ashk kā jugnū ke rū-ba-rū honā

junun ke ahd mein aawara ku-ba-ku hona

baghair mushk ke sanson ka mushk-bu hona

usi ne chaha nigahon ke ru-ba-ru hona

wagarna sahl na tha us se guftugu hona

aba qaba ke liye to ye baat mumkin hai

jigar ke chaak ka mumkin nahin rafu hona

na jaane kab se hai hairat-zada banae hue

us ek su ka nigahon mein chaar su hona

tulua hona ufuq par mah-e-visal sa kuchh

tere badan ka sar-e-sham rang-o-bu hona

jahan jahan se nikal kar ye barq girti hai

wahan wahan hai ye chaak-e-falak rafu hona

thakan malal udasi safar ki nakaami

ye ho qubul to sargarm-e-justuju hona

main apna KHun diye ja raha hun duniya ko

ab is ke baad shafaq ko hai suraKH-ru hona

shab-e-firaq ne aasan kar diya 'iqbaal'

hamare ashk ka jugnu ke ru-ba-ru hona