junun KHatm hua etidal rah gaya hai

junūn ḳhatm huā e'tidāl rah gayā hai

biphar rahā thā jo dariyā niDhāl rah gayā hai

jise duā ke sahāre pe ibtidā kiyā thā

guzar gayā hai vo mausam vo saal rah gayā hai

tumhāre sard ravayye se saaf zāhir hai

hamārā kuchh to ta.alluq bahāl rah gayā hai

jhaTak ke haath chalā hai baḌī hī ujlat meñ

zarā Thahar ki zarūrī savāl rah gayā hai

ki dil meñ Tiis bhī uThtī hai der der ke baad

tirā ḳhayāl bhī ab ḳhāl-ḳhāl rah gayā hai

gayā hai jo bhī use rauñd kar gayā āḳhir

ye bāġh-e-ḳhvāb-numā pā.emāl rah gayā hai

charāġh-e-hijr se ubhrī hai ik dhueñ kī lakīr

so dard bujh gayā hai aur malāl rah gayā hai

junun KHatm hua e'tidal rah gaya hai

biphar raha tha jo dariya niDhaal rah gaya hai

jise dua ke sahaare pe ibtida kiya tha

guzar gaya hai wo mausam wo sal rah gaya hai

tumhaare sard rawayye se saf zahir hai

hamara kuchh to talluq bahaal rah gaya hai

jhaTak ke hath chala hai baDi hi ujlat mein

zara Thahar ki zaruri sawal rah gaya hai

ki dil mein Tis bhi uThti hai der der ke baad

tera KHayal bhi ab KHal-KHal rah gaya hai

gaya hai jo bhi use raund kar gaya aaKHir

ye bagh-e-KHwab-numa paemal rah gaya hai

charagh-e-hijr se ubhri hai ek dhuen ki lakir

so dard bujh gaya hai aur malal rah gaya hai