junūñ kī fasl aa.ī baḌh ga.ī tauqīr patthar kī
sar-e-shorīda ḳhud karne lagā tadbīr patthar kī
ye mushkil kis tarah hal ho nahīñ shamshīr patthar kī
dil-e-sayyād patthar gardan-e-naḳhchīr patthar kī
binā ā.īna chamkī kis qadar taqdīr patthar kī
tumhāre rū-ba-rū aayā zahe tauqīr patthar kī
hamāre josh-e-vahshat ne ye ham ko rañg dikhlāyā
na kuchh taqsīr laḌkoñ kī na kuchh taqsīr patthar kī
nishāñ kuchh aap bhī kar deñ huā dafn aap kā majnūñ
pa.e tārīḳh rehlat kījiye tadbīr patthar kī
ragoñ meñ merī peshānī kī josh-e-ḳhūñ huā paidā
hikāyat likh chukā jab kātib-e-taqdīr patthar kī
jo tū samjhe to mere tere dil kī ek sūrat hai
ye hai tasvīr miTTī kī vo hai tasvīr patthar kī
na jis meñ lafz-o-ma.anī hoñ kalām us ko nahīñ kahte
chaTaknā pattharoñ kā kab huī taqrīr patthar kī
tirā saudā jahāñ par thā rasā.ī ho ga.ī vaañ tak
paḌā sar par hamāre laḌ ga.ī taqdīr patthar kī
lagāyā sañg apne haath se tū ne mire sar par
ḳhushā taqdīr merī aur zahe taqdīr patthar kī
qasam logo adab se aañkh uThā ke maiñ ne dekhā ho
tumhāre dar meñ lohe kī hai yā zanjīr patthar kī
dil-e-saḳht ai 'rashīd'-e-zār apnā hai garāñ ham ko
bajā hai kis tarah bhārī na ho tasvīr patthar kī
junun ki fasl aai baDh gai tauqir patthar ki
sar-e-shorida KHud karne laga tadbir patthar ki
ye mushkil kis tarah hal ho nahin shamshir patthar ki
dil-e-sayyaad patthar gardan-e-naKHchir patthar ki
bina aaina chamki kis qadar taqdir patthar ki
tumhaare ru-ba-ru aaya zahe tauqir patthar ki
hamare josh-e-wahshat ne ye hum ko rang dikhlaya
na kuchh taqsir laDkon ki na kuchh taqsir patthar ki
nishan kuchh aap bhi kar den hua dafn aap ka majnun
pae tariKH rehlat kijiye tadbir patthar ki
ragon mein meri peshani ki josh-e-KHun hua paida
hikayat likh chuka jab katib-e-taqdir patthar ki
jo tu samjhe to mere tere dil ki ek surat hai
ye hai taswir miTTi ki wo hai taswir patthar ki
na jis mein lafz-o-mani hon kalam us ko nahin kahte
chaTakna pattharon ka kab hui taqrir patthar ki
tera sauda jahan par tha rasai ho gai wan tak
paDa sar par hamare laD gai taqdir patthar ki
lagaya sang apne hath se tu ne mere sar par
KHusha taqdir meri aur zahe taqdir patthar ki
qasam logo adab se aankh uTha ke main ne dekha ho
tumhaare dar mein lohe ki hai ya zanjir patthar ki
dil-e-saKHt ai 'rashid'-e-zar apna hai garan hum ko
baja hai kis tarah bhaari na ho taswir patthar ki
Source:
Gulistan-e-Rasheed (Pg. ghazal-88 page-83)
-
Author:
Piyare Sahab Rasheed
-
- Year of Publication: 1952
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.