junun ko bhi arz-e-haal ka ehtimam karna sikha rahi hun

junūñ ko bhī arz-e-hāl kā ehtimām karnā sikhā rahī huuñ

maiñ dil kī dhaḌkan ko shor-e-ġham se kalām karnā sikhā rahī huuñ

sikhā rahī huuñ charāġh ko ye ki jal ke bujhne kā husn kyā hai

havāoñ ko raushnī kā maiñ ehtirām karnā sikhā rahī huuñ

vo zindagī jis ke naaz uThā.e na jaane kis lamha ruḳh badal le

isī liye to maiñ apnī sub.hoñ ko shaam karnā sikhā rahī huuñ

na.e mafāhīm raah paa.eñ na.e ma.ānī safar pe nikleñ

so harf ko shahr-e-āgahī meñ qayām karnā sikhā rahī huuñ

samundaroñ ke safar meñ āḳhir ye kin jazīroñ kī raushnī hai

na.ī zamīnoñ ke raaz sāhil ko aam karnā sikhā rahī huuñ

ye dā.ere zāviye ye qauseñ ye nok-e-parkār kā hunar haiñ

isī hunar se tamām ko nā-tamām karnā sikhā rahī huuñ

na aah koī na koī aañsū ye dard kī bazm hai so dil ko

baḌe salīqe se jashn kā intizām karnā sikhā rahī huuñ

junun ko bhi arz-e-haal ka ehtimam karna sikha rahi hun

main dil ki dhaDkan ko shor-e-gham se kalam karna sikha rahi hun

sikha rahi hun charagh ko ye ki jal ke bujhne ka husn kya hai

hawaon ko raushni ka main ehtiram karna sikha rahi hun

wo zindagi jis ke naz uThae na jaane kis lamha ruKH badal le

isi liye to main apni subhon ko sham karna sikha rahi hun

nae mafahim rah paen nae maani safar pe niklen

so harf ko shahr-e-agahi mein qayam karna sikha rahi hun

samundaron ke safar mein aaKHir ye kin jaziron ki raushni hai

nai zaminon ke raaz sahil ko aam karna sikha rahi hun

ye daere zawiye ye qausen ye nok-e-parkar ka hunar hain

isi hunar se tamam ko na-tamam karna sikha rahi hun

na aah koi na koi aansu ye dard ki bazm hai so dil ko

baDe saliqe se jashn ka intizam karna sikha rahi hun