junun mein ab wo afzaish nahin hai

junūñ meñ ab vo afzā.ish nahīñ hai

zuleḳhā meñ bhī zebā.ish nahīñ hai

tum apnā ishq apne paas rakkho

mirī bāñhoñ meñ gunjā.ish nahīñ hai

mohabbat paak hai merī yaqīñ kar

havas kī koī ālā.ish nahīñ hai

mirī jaañ ishq kī sarhad na pūchho

zamīn-e-dil kī paimā.ish nahīñ hai

mohabbat ek fitrī shai hai jānāñ

ye mere dil kī paidā.ish nahīñ hai

zabāñ terī mujhe chāhe hai lekin

nigāhoñ meñ vo farmā.ish nahīñ hai

javāno merī bas ik baat sun lo

junūñ meñ koī āsā.ish nahīñ hai

jahān-e-dil ke har goshe meñ 'kāshif'

pareshānī hai pairā.ish nahīñ hai

junun mein ab wo afzaish nahin hai

zuleKHa mein bhi zebaish nahin hai

tum apna ishq apne pas rakkho

meri banhon mein gunjaish nahin hai

mohabbat pak hai meri yaqin kar

hawas ki koi aalaish nahin hai

meri jaan ishq ki sarhad na puchho

zamin-e-dil ki paimaish nahin hai

mohabbat ek fitri shai hai jaanan

ye mere dil ki paidaish nahin hai

zaban teri mujhe chahe hai lekin

nigahon mein wo farmaish nahin hai

jawano meri bas ek baat sun lo

junun mein koi aasaish nahin hai

jahan-e-dil ke har goshe mein 'kashif'

pareshani hai pairaish nahin hai