جنوں میں اب وہ افزائش نہیں ہے

جنوں میں اب وہ افزائش نہیں ہے

زلیخا میں بھی زیبائش نہیں ہے

تم اپنا عشق اپنے پاس رکھو

مری بانہوں میں گنجائش نہیں ہے

محبت پاک ہے میری یقیں کر

ہوس کی کوئی آلائش نہیں ہے

مری جاں عشق کی سرحد نہ پوچھو

زمین دل کی پیمائش نہیں ہے

محبت ایک فطری شے ہے جاناں

یہ میرے دل کی پیدائش نہیں ہے

زباں تیری مجھے چاہے ہے لیکن

نگاہوں میں وہ فرمائش نہیں ہے

جوانو میری بس اک بات سن لو

جنوں میں کوئی آسائش نہیں ہے

جہان دل کے ہر گوشے میں کاشفؔ

پریشانی ہے پیرائش نہیں ہے