justuju-e-nashat-e-mubham kya

justujū-e-nashāt-e-mub.ham kyā

dil mayassar hai lazzat-e-ġham kyā

masti-e-hosh ke fasāne haiñ

jashn-e-parvez o ishrat-e-jam kyā

ek aalam ko dekhtā huuñ maiñ

ye tirā dhyān hai mujassam kyā

izn hañgāma-e-nigāh na de

kyā hamārī bisāt aur ham kyā

nañg-e-rahmat hai ehtiyāj-e-duā

intizār-e-gadā-e-mubram kyā

merī fitrat hai gosh bar āvāz

sun rahā huuñ navā-e-mehram kyā

miT gayā nām-e-āshiqī ab aur

chāhtā hai vo husn-e-barham kyā

kaash pūchho to kuchh batā.eñ ham

hāsil-e-shikva haa.e bāham kyā

dil kamāl-e-hayāt hai 'fānī'

dil ke maare huoñ kā mātam kyā

justuju-e-nashat-e-mubham kya

dil mayassar hai lazzat-e-gham kya

masti-e-hosh ke fasane hain

jashn-e-parwez o ishrat-e-jam kya

ek aalam ko dekhta hun main

ye tera dhyan hai mujassam kya

izn hangama-e-nigah na de

kya hamari bisat aur hum kya

nang-e-rahmat hai ehtiyaj-e-dua

intizar-e-gada-e-mubram kya

meri fitrat hai gosh bar aawaz

sun raha hun nawa-e-mehram kya

miT gaya nam-e-ashiqi ab aur

chahta hai wo husn-e-barham kya

kash puchho to kuchh bataen hum

hasil-e-shikwa hae baham kya

dil kamal-e-hayat hai 'fani'

dil ke mare huon ka matam kya