justuju meri kahin thi aur main bhaTka kahin

justujū merī kahīñ thī aur maiñ bhaTkā kahīñ

mil ga.ī manzil mujhe to kho gayā rastā kahīñ

pūchhtā rahtā huuñ ḳhud se kyā use dekhā kahīñ

aa.ine ke zāviyoñ meñ kho gayā chehra kahīñ

mujh ko mat roko ki maiñ itnā thakan se chuur huuñ

phir Thahar hī jā.ūñgā maiñ ab agar Thahrā kahīñ

muddatoñ ke ba.ad phir nam ho ga.iiñ āñkheñ mirī

phir mire ehsās ke patthar meñ dil dhaḌkā kahīñ

TuuT kar chāhā tujhe lekin ye hasrat rah ga.ī

tujh se dil kī baat kahte tū agar miltā kahīñ

maiñ kisī sūrat nikal aayā huuñ apnī zaat se

Dar rahā huuñ mil na jaa.e phir vahī duniyā kahīñ

ek hī raftār se kashtī ko mat khenā yahāñ

vaqt kā dariyā kahīñ uthlā hai to gahrā kahīñ

kyuuñ dilāsā de rahe ho muntashir karne ke ba.ad

TuuT kar phir shāḳh se juḌtā hai ik pattā kahīñ

justuju meri kahin thi aur main bhaTka kahin

mil gai manzil mujhe to kho gaya rasta kahin

puchhta rahta hun KHud se kya use dekha kahin

aaine ke zawiyon mein kho gaya chehra kahin

mujh ko mat roko ki main itna thakan se chur hun

phir Thahar hi jaunga main ab agar Thahra kahin

muddaton ke baad phir nam ho gain aankhen meri

phir mere ehsas ke patthar mein dil dhaDka kahin

TuT kar chaha tujhe lekin ye hasrat rah gai

tujh se dil ki baat kahte tu agar milta kahin

main kisi surat nikal aaya hun apni zat se

Dar raha hun mil na jae phir wahi duniya kahin

ek hi raftar se kashti ko mat khena yahan

waqt ka dariya kahin uthla hai to gahra kahin

kyun dilasa de rahe ho muntashir karne ke baad

TuT kar phir shaKH se juDta hai ek patta kahin