justuju teri dard-e-sar Thahri

justujū terī dard-e-sar Thahrī

le ke mujh ko ye dar-ba-dar Thahrī

tujh se mansūb jab talak maiñ rahī

merī hastī bhī mo'atabar Thahrī

ye mirī zindagī tumhāre baġhair

kitnī be-rañg-o-muḳhtasar Thahrī

mushkileñ mujh ko DhūñDne nikleñ

dam jo lene ko lamha bhar Thahrī

ye salīqa tujhī se aayā hai

baat karne meñ bā-hunar Thahrī

uf tirī bāñhoñ kā hisār-e-latīf

yuuñ lagā shaam meñ sahar Thahrī

jis pe mahv-e-safar rahā tū mudām

bas vahī merī rahguzar Thahrī

ek tum ho ki haath meñ patthar

aur maiñ ek shīshagar Thahrī

apne irfān-e-zāt se 'rūmī'

apne andar maiñ mo'atabar Thahrī

justuju teri dard-e-sar Thahri

le ke mujh ko ye dar-ba-dar Thahri

tujh se mansub jab talak main rahi

meri hasti bhi mo'atabar Thahri

ye meri zindagi tumhaare baghair

kitni be-rang-o-muKHtasar Thahri

mushkilen mujh ko DhunDne niklen

dam jo lene ko lamha bhar Thahri

ye saliqa tujhi se aaya hai

baat karne mein ba-hunar Thahri

uf teri banhon ka hisar-e-latif

yun laga sham mein sahar Thahri

jis pe mahw-e-safar raha tu mudam

bas wahi meri rahguzar Thahri

ek tum ho ki hath mein patthar

aur main ek shishagar Thahri

apne irfan-e-zat se 'rumi'

apne andar main mo'atabar Thahri