jun kali wo khil gain baKHt-e-sikandar dekh kar

juuñ kalī vo khil ga.iiñ baḳht-e-sikandar dekh kar

aap kī tasvīr ko aa.iiñ na andar dekh kar

saarī bāhar vāliyāñ aa.iiñ na andar dekh kar

ā.ina-ḳhāne meñ tujh ko ai sikandar dekh kar

phūle phūle par kā panchhī shāḳh-e-gul par dekh kar

naama laayā hogā maiñ samjhī kabūtar dekh kar

ḳhātir-e-husn-e-gul-e-tar aage jaanā hai abas

jānib-e-baliyā buā gulhā-e-baksar dekh kar

kyā kahūñ kyoñ ho ga.ī maiñ kushta-e-tīr-e-nigāh

rahm kī ḳhū aap meñ mehr-e-munavvar dekh kar

ham ne jaanā aa ga.iiñ ham-jolī-e-parda-nashīñ

sar se pā tak zer-e-chādar tum ko gauhar dekh kar

yā kalā.ī dekhte the yā dulā.ī oḌh lī

paañv phailāne lage tayyār bistar dekh kar

roTī kapḌe ko bhī ab begam buā muhtāj hai

aa ga.ī thī chaal meñ deputy collector dekh kar

mohnī thī yā ki ruḳh meñ dekh kar but ho ga.ī

aap ko mandir ke andar shām-sundar dekh kar

kis tarah baajī na maano haif apnī aañkh se

lauñDī maiḳhāne meñ aa.ī un ko aksar dekh kar

kyā kahūñ kyā kyā na machle aaj lene ke liye

vo sunahrī goT vaalī uudī chādar dekh kar

roTī kapḌā do use ghar meñ bhī rakkho saut ko

ab kahāñ jaa.e nigoḌī aap kā dar dekh kar

is ko rakkhā us ko chhoḌā hai nigoḌā bevafā

chhūTte hī aur kar lī mujh se behtar dekh kar

merī 'anqā' kā hai baajī vo kalām-e-dilrubā

mast ho ho jaate haiñ jis ko suḳhanvar dekh kar

jun kali wo khil gain baKHt-e-sikandar dekh kar

aap ki taswir ko aain na andar dekh kar

sari bahar waliyan aain na andar dekh kar

aaina-KHane mein tujh ko ai sikandar dekh kar

phule phule par ka panchhi shaKH-e-gul par dekh kar

nama laya hoga main samjhi kabutar dekh kar

KHatir-e-husn-e-gul-e-tar aage jaana hai abas

jaanib-e-baliya bua gulha-e-baksar dekh kar

kya kahun kyon ho gai main kushta-e-tir-e-nigah

rahm ki KHu aap mein mehr-e-munawwar dekh kar

hum ne jaana aa gain ham-joli-e-parda-nashin

sar se pa tak zer-e-chadar tum ko gauhar dekh kar

ya kalai dekhte the ya dulai oDh li

panw phailane lage tayyar bistar dekh kar

roTi kapDe ko bhi ab begam bua muhtaj hai

aa gai thi chaal mein deputy collector dekh kar

mohni thi ya ki ruKH mein dekh kar but ho gai

aap ko mandir ke andar sham-sundar dekh kar

kis tarah baji na mano haif apni aankh se

launDi maiKHane mein aai un ko aksar dekh kar

kya kahun kya kya na machle aaj lene ke liye

wo sunahri goT wali udi chadar dekh kar

roTi kapDa do use ghar mein bhi rakkho saut ko

ab kahan jae nigoDi aap ka dar dekh kar

is ko rakkha us ko chhoDa hai nigoDa bewafa

chhuTte hi aur kar li mujh se behtar dekh kar

meri 'anqa' ka hai baji wo kalam-e-dilruba

mast ho ho jate hain jis ko suKHanwar dekh kar