jun zarra nahin ek jagah KHak-nashin hum

juuñ zarra nahīñ ek jagah ḳhāk-nashīñ ham

ai mahr-e-jahāñ-tāb jahāñ tū hai vahīñ ham

shab halqa-e-rindāñ meñ ajab sair thī saaqī

sāġhar ko samajhte the mah-e-hālā-nashīñ ham

sete haiñ sadā rashk-e-atū-e-qalamī dekh

har tār-e-sarishk apne se dāmān-e-zamīñ ham

ai rashk-e-nasīm-e-saharī kyuuñ hai mukaddar

gulshan meñ tujhe dekhte haiñ chīñ-ba-jabīñ ham

barpā na kahīñ kiije ab shor-e-qayāmat

vahshat-zada ai ḳhāna-e-zanjīr nahīñ ham

sar-rishta rah-e-ishq kā ab haath lagā hai

juuñ dāna-e-tasbīh na Thahreñge kahīñ ham

le kar mah-o-ḳhurshīd kī phir teġh-o-sipar ko

ai charḳh tujhe jānte haiñ bar-sar-e-kīñ ham

yak dast uThā leveñge is safha-e-dil par

naqsh-e-qadam-e-yār ko juuñ naqsh o nagīñ ham

īsā-nafas ab jald pahuñch tū ki haiñ tujh bin

mehmān koī dam ke dam-e-bāz-pasīñ ham

kho baiThe haiñ us ishq ke hāthoñ se 'nasīr' ab

hosh-o-ḳhirad o sabr-o-qarār o dil-o-dīñ ham

jun zarra nahin ek jagah KHak-nashin hum

ai mahr-e-jahan-tab jahan tu hai wahin hum

shab halqa-e-rindan mein ajab sair thi saqi

saghar ko samajhte the mah-e-haala-nashin hum

sete hain sada rashk-e-atu-e-qalami dekh

har tar-e-sarishk apne se daman-e-zamin hum

ai rashk-e-nasim-e-sahari kyun hai mukaddar

gulshan mein tujhe dekhte hain chin-ba-jabin hum

barpa na kahin kije ab shor-e-qayamat

wahshat-zada ai KHana-e-zanjir nahin hum

sar-rishta rah-e-ishq ka ab hath laga hai

jun dana-e-tasbih na Thahrenge kahin hum

le kar mah-o-KHurshid ki phir tegh-o-sipar ko

ai charKH tujhe jaante hain bar-sar-e-kin hum

yak dast uTha lewenge is safha-e-dil par

naqsh-e-qadam-e-yar ko jun naqsh o nagin hum

isa-nafas ab jald pahunch tu ki hain tujh bin

mehman koi dam ke dam-e-baz-pasin hum

kho baiThe hain us ishq ke hathon se 'nasir' ab

hosh-o-KHirad o sabr-o-qarar o dil-o-din hum