kafir wo zulf-e-pur-shikan ek is taraf ek us taraf

kāfir vo zulf-e-pur-shikan ek is taraf ek us taraf

phir us pe chashm-e-sehr-e-fan ek is taraf ek us taraf

hangām-e-rehlat dekhiye dil kis taraf apnā jhuke

baiThe haiñ shaiḳh-o-barhaman ek is taraf ek us taraf

zulfoñ kī ye sargoshiyāñ dil par balā.eñ lā.eñgī

ġhammāz hai garm-e-suḳhan ek is taraf ek us taraf

ġhairoñ kā majma.a aur tum pariyoñ kā jamghaT aur ham

pahlū-ba-pahlū anjuman ek is taraf ek us taraf

dil ek tanhā biich meñ āñkheñ tirī saffāk do

shamshīr-zan nāvak-fagan ek is taraf ek us taraf

maiñ mar gayā huuñ vasl meñ rāhat ho har pahlū mujhe

takiye hoñ do zer-e-kafan ek is taraf ek us taraf

tū aur dahne baa.eñ hoñ lailā-o-shīrīñ bazm meñ

maiñ aur qais-o-kohkan ek is taraf ek us taraf

donoñ farishte dosh par kyā likh sakeñ hālat mirī

ālūda-e-ranj-o-mehan ek is taraf ek us taraf

ruḳhsār tere sīm-gūñ phir us pe gul-gūne kā rang

phūlā hai kyā rang-e-chaman ek is taraf ek us taraf

itrā rahā hai 'dāġh' kyā hangām-e-gul-gasht-e-chaman

rangīñ-qabā gul-pairahan ek is taraf ek us taraf

kafir wo zulf-e-pur-shikan ek is taraf ek us taraf

phir us pe chashm-e-sehr-e-fan ek is taraf ek us taraf

hangam-e-rehlat dekhiye dil kis taraf apna jhuke

baiThe hain shaiKH-o-barhaman ek is taraf ek us taraf

zulfon ki ye sargoshiyan dil par balaen laengi

ghammaz hai garm-e-suKHan ek is taraf ek us taraf

ghairon ka majma aur tum pariyon ka jamghaT aur hum

pahlu-ba-pahlu anjuman ek is taraf ek us taraf

dil ek tanha bich mein aankhen teri saffak do

shamshir-zan nawak-fagan ek is taraf ek us taraf

main mar gaya hun wasl mein rahat ho har pahlu mujhe

takiye hon do zer-e-kafan ek is taraf ek us taraf

tu aur dahne baen hon laila-o-shirin bazm mein

main aur qais-o-kohkan ek is taraf ek us taraf

donon farishte dosh par kya likh saken haalat meri

aaluda-e-ranj-o-mehan ek is taraf ek us taraf

ruKHsar tere sim-gun phir us pe gul-gune ka rang

phula hai kya rang-e-chaman ek is taraf ek us taraf

itra raha hai 'dagh' kya hangam-e-gul-gasht-e-chaman

rangin-qaba gul-pairahan ek is taraf ek us taraf