kali hawa chali gai rang-e-ziyan uchhaal ke

kaalī havā chalī ga.ī rang-e-ziyāñ uchhāl ke

mere dayār meñ gulo rakhnā qadam sañbhāl ke

bād-e-sahar ḳhamosh thī jāgtī thiiñ samā'ateñ

mere laboñ pe raqs meñ harf the arz-e-hāl ke

chashm darīche shauq ke band kiye ga.e sabhī

aur haTā diye ga.e parde dar-e-ḳhayāl ke

mauj-e-shamīm is liye chuum rahī hai gard-e-rāh

vo bhī musāfiroñ meñ hai qāfila-e-jamāl ke

āḳhirī had nahīñ hai duur ab na bahut kare ġhurūr

zulm ko de do ye ḳhabar aa ga.e din zavāl ke

koī zamīñ ho koī bahr jaise nikāltā huuñ maiñ

koī dikhā.e to mujhe she'r na.e nikāl ke

jaanā jo chāhtā hai tū kū-e-yaqīn kī taraf

rāste pahle band kar kūcha-e-ehtimāl ke

ek savāl se mire ho ga.e lā-javāb sab

koī javāb detā kyā ruḳh the ka.ī savāl ke

koī bhī naqsh-e-zindagī mujh se nihāñ na rah sakā

merī nazar meñ haiñ 'mujīb' aa.ine māh-o-sāl ke

kali hawa chali gai rang-e-ziyan uchhaal ke

mere dayar mein gulo rakhna qadam sanbhaal ke

baad-e-sahar KHamosh thi jagti thin sama'aten

mere labon pe raqs mein harf the arz-e-haal ke

chashm dariche shauq ke band kiye gae sabhi

aur haTa diye gae parde dar-e-KHayal ke

mauj-e-shamim is liye chum rahi hai gard-e-rah

wo bhi musafiron mein hai qafila-e-jamal ke

aaKHiri had nahin hai dur ab na bahut kare ghurur

zulm ko de do ye KHabar aa gae din zawal ke

koi zamin ho koi bahr jaise nikalta hun main

koi dikhae to mujhe she'r nae nikal ke

jaana jo chahta hai tu ku-e-yaqin ki taraf

raste pahle band kar kucha-e-ehtimal ke

ek sawal se mere ho gae la-jawab sab

koi jawab deta kya ruKH the kai sawal ke

koi bhi naqsh-e-zindagi mujh se nihan na rah saka

meri nazar mein hain 'mujib' aaine mah-o-sal ke