kaam aa gai hai gardish-e-dauran kabhi kabhi

kaam aa ga.ī hai gardish-e-daurāñ kabhī kabhī

dekhī hai zulf-e-yār pareshāñ kabhī kabhī

ḳhūn-e-jigar se ātish-e-sozāñ ko shah milī

ḳhud dard ban ke rah gayā darmāñ kabhī kabhī

tūfāñ kī Thokaroñ se kināra kabhī milā

sāhil se aa ke le gayā tūfāñ kabhī kabhī

vahshat ne mujh ko bazm-e-tarab se uThā diyā

niklā us anjuman se pareshāñ kabhī kabhī

aksar ḳhushī hī ban ga.ī hai dushman-e-sukūñ

ġham ban gayā sukūt kā sāmāñ kabhī kabhī

dast-e-ḳhirad ne maslahatan chaak bhī kiyā

sī bhī liyā junūñ ne garebāñ kabhī kabhī

dīvānoñ meñ shumār huā us ġharīb kā

'iqbāl' ho gayā jo ġhazal-ḳhvāñ kabhī kabhī

kaam aa gai hai gardish-e-dauran kabhi kabhi

dekhi hai zulf-e-yar pareshan kabhi kabhi

KHun-e-jigar se aatish-e-sozan ko shah mili

KHud dard ban ke rah gaya darman kabhi kabhi

tufan ki Thokaron se kinara kabhi mila

sahil se aa ke le gaya tufan kabhi kabhi

wahshat ne mujh ko bazm-e-tarab se uTha diya

nikla us anjuman se pareshan kabhi kabhi

aksar KHushi hi ban gai hai dushman-e-sukun

gham ban gaya sukut ka saman kabhi kabhi

dast-e-KHirad ne maslahatan chaak bhi kiya

si bhi liya junun ne gareban kabhi kabhi

diwanon mein shumar hua us gharib ka

'iqbaal' ho gaya jo ghazal-KHwan kabhi kabhi