kaam aai ishq ki diwangi kal raat ko

kaam aa.ī ishq kī dīvāngī kal raat ko

husn ne baḳhshī matā-e-dostī kal raat ko

qāmat-e-dilkash libās-e-surḳh meñ thī mehmāñ

mere ghar ik surḳh maḳhmal kī parī kal raat ko

tamtamā.e gaal bhīge hoñT chashm-e-nīm-vā

thī mujassam jaise merī shā.irī kal raat ko

vo mire shāna-ba-shāna sahn meñ mahv-e-ḳhirām

chāñd ke pahlū meñ jaise chāñdnī kal raat ko

narm bāñhoñ se mire shānoñ se kuchh sāzish huī

paḌ ga.ī gardan meñ motī kī laḌī kal raat ko

shab ke sannāTe meñ paimān-e-vafā bāñdhe ga.e

kuchh na.e va.adoñ ne kī jādūgarī kal raat ko

har ghaḌī 'sūfī' nashāt-añgez lamhoñ meñ kaTī

zindagī thī dar-haqīqat zindagī kal raat ko

kaam aai ishq ki diwangi kal raat ko

husn ne baKHshi mata-e-dosti kal raat ko

qamat-e-dilkash libas-e-surKH mein thi mehman

mere ghar ek surKH maKHmal ki pari kal raat ko

tamtamae gal bhige honT chashm-e-nim-wa

thi mujassam jaise meri shairi kal raat ko

wo mere shana-ba-shana sahn mein mahw-e-KHiram

chand ke pahlu mein jaise chandni kal raat ko

narm banhon se mere shanon se kuchh sazish hui

paD gai gardan mein moti ki laDi kal raat ko

shab ke sannaTe mein paiman-e-wafa bandhe gae

kuchh nae wadon ne ki jadugari kal raat ko

har ghaDi 'sufi' nashat-angez lamhon mein kaTi

zindagi thi dar-haqiqat zindagi kal raat ko