kaam aasan nazar aaya mujhe mushkil ho kar

kaam āsāñ nazar aayā mujhe mushkil ho kar

hāsil-e-umr milā hasrat-e-hāsil ho kar

do jahāñ mujh ko mile haiñ tapish-e-dil ho kar

ik nazar dekh to luuñ dīda-e-bismil ho kar

kis par aatā hai ye ilzām ḳhudā ḳhair kare

meñ tumheñ bhuul gayā ġhair pe maa.il ho kar

kaun sī baat hai ā.īne meñ jo mujh meñ nahīñ

baiTh to jaao zarā mere muqābil ho kar

vahshat-e-be-kasī-e-shauq liye jaatī hai

naqsh-e-pā aage baḌhā dūrī-e-manzil ho kar

ḳhvāhish-e-marg sar-e-rishta-e-ummīd sahī

āḳhir uljhe na kahīñ vo girah-e-dil ho kar

parda-poshī bhī maze de ga.ī allāh allāh

sāmne aa.ī ajal ḳhanda-e-qātil ho kar

nashsha-e-ḳhvāb-e-adam surma-e-bedārī hai

āñkheñ khul jaatī haiñ is parda meñ ġhāfil ho kar

saf-e-mehshar hai mirā halqa-e-āġhosh nahīñ

kyā bache jaate ho aġhyār meñ shāmil ho kar

dil meñ rah kar bhī tamannā kī ḳhabar rakhte nahīñ

qāfile saikḌoñ guzre pas-e-mahmil ho kar

merī nazroñ meñ hai ḳhurshīd-e-qayāmat kī numūd

barsoñ pahlū meñ rahā ābla-e-dil ho kar

āñkheñ phir uThne lagīñ sharm kā parda ban kar

lo vo phir aate haiñ rañg-e-ruḳh-e-mahfil ho kar

gila-e-tishnagī-e-shauq hai ik tūl-e-amal

mil ga.e ḳhaak meñ āḳhir lab-e-sāhil ho kar

tīra-baḳhtī se milā roz-e-jazā ko hissa

rah gayā hai ruḳh-e-afsos pe ik til ho kar

saaf aatā hai nazar tum ho miTāne vaale

kyā kiyā parda-e-taqdīr ne haa.il ho kar

ahl-e-duniyā kī taraf dast-e-duā kyoñ uTTheñ

bhiik aġhyār se ik dost ke saa.il ho kar

jalva un kā hai kalīm un ke haiñ aiman un kā

tuur kyoñ jalne lagā beach meñ haa.il ho kar

asar-e-ġhamza-e-shīrīñ dil-e-ḳhusrav meñ sahī

rah gayā sīnā-e-farhād agar sil ho kar

ai 'vafā' tāle.a-e-nāshād ko rashk aatā hai

ham rahe jaate haiñ nuqsān meñ kāmil ho kar

kaam aasan nazar aaya mujhe mushkil ho kar

hasil-e-umr mila hasrat-e-hasil ho kar

do jahan mujh ko mile hain tapish-e-dil ho kar

ek nazar dekh to lun dida-e-bismil ho kar

kis par aata hai ye ilzam KHuda KHair kare

mein tumhein bhul gaya ghair pe mail ho kar

kaun si baat hai aaine mein jo mujh mein nahin

baiTh to jao zara mere muqabil ho kar

wahshat-e-be-kasi-e-shauq liye jati hai

naqsh-e-pa aage baDha duri-e-manzil ho kar

KHwahish-e-marg sar-e-rishta-e-ummid sahi

aaKHir uljhe na kahin wo girah-e-dil ho kar

parda-poshi bhi maze de gai allah allah

samne aai ajal KHanda-e-qatil ho kar

nashsha-e-KHwab-e-adam surma-e-bedari hai

aankhen khul jati hain is parda mein ghafil ho kar

saf-e-mehshar hai mera halqa-e-aghosh nahin

kya bache jate ho aghyar mein shamil ho kar

dil mein rah kar bhi tamanna ki KHabar rakhte nahin

qafile saikDon guzre pas-e-mahmil ho kar

meri nazron mein hai KHurshid-e-qayamat ki numud

barson pahlu mein raha aabla-e-dil ho kar

aankhen phir uThne lagin sharm ka parda ban kar

lo wo phir aate hain rang-e-ruKH-e-mahfil ho kar

gila-e-tishnagi-e-shauq hai ek tul-e-amal

mil gae KHak mein aaKHir lab-e-sahil ho kar

tira-baKHti se mila roz-e-jaza ko hissa

rah gaya hai ruKH-e-afsos pe ek til ho kar

saf aata hai nazar tum ho miTane wale

kya kiya parda-e-taqdir ne hail ho kar

ahl-e-duniya ki taraf dast-e-dua kyon uTThen

bhik aghyar se ek dost ke sail ho kar

jalwa un ka hai kalim un ke hain aiman un ka

tur kyon jalne laga beach mein hail ho kar

asar-e-ghamza-e-shirin dil-e-KHusraw mein sahi

rah gaya sina-e-farhad agar sil ho kar

ai 'wafa' talea-e-nashad ko rashk aata hai

hum rahe jate hain nuqsan mein kaamil ho kar