kaam bas fatiha-KHwani se nahin hota hai

kaam bas fātiha-ḳhvānī se nahīñ hotā hai

ishq iz.hār zabānī se nahīñ hotā hai

hai ye qur.ān amal karne kī daulat yaaro

nafā bas lafz-e-ma.ānī se nahīñ hotā hai

kuchh ināyat yahāñ ahbāb bhī kar jaate haiñ

sab ziyāñ dushman-e-jānī se nahīñ hotā hai

kaam ho jaatā hai bas misra.a-e-avval se bhī kabhī

kaam jo misra-e-sānī se nahīñ hotā hai

ye tijārat nahīñ ik aham ibādat hai miyāñ

ishq meñ lābh-o-hānī se nahīñ hotā hai

ba.az auqāt Thaharne kī talab hotī hai

kaam har vaqt ravānī se nahīñ hotā hai

jān-levā kabhī ḳhāmoshī bhī ho jaatī hai

ḳhuun bas sho.ala-bayānī se nahīñ hotā hai

aarzī pyaas to bujh jaatī hai is se lekin

pyaas miT jaa.e ye paanī se nahīñ hotā hai

piinā paḌtā hai yahāñ jām-e-shahādat 'qādir'

naam bas qissa kahānī se nahīñ hotā hai

kaam bas fatiha-KHwani se nahin hota hai

ishq izhaar zabani se nahin hota hai

hai ye quran amal karne ki daulat yaro

nafa bas lafz-e-maani se nahin hota hai

kuchh inayat yahan ahbab bhi kar jate hain

sab ziyan dushman-e-jaani se nahin hota hai

kaam ho jata hai bas misra-e-awwal se bhi kabhi

kaam jo misra-e-sani se nahin hota hai

ye tijarat nahin ek aham ibaadat hai miyan

ishq mein labh-o-hani se nahin hota hai

baz auqat Thaharne ki talab hoti hai

kaam har waqt rawani se nahin hota hai

jaan-lewa kabhi KHamoshi bhi ho jati hai

KHun bas shoala-bayani se nahin hota hai

aarzi pyas to bujh jati hai is se lekin

pyas miT jae ye pani se nahin hota hai

pina paDta hai yahan jam-e-shahadat 'qadir'

nam bas qissa kahani se nahin hota hai