kaam hai un ka jafa wo ba-wafa kahne ko hain

kaam hai un kā jafā vo bā-vafā kahne ko haiñ

dete haiñ jo dard-e-dil ahl-e-shifā kahne ko haiñ

ham to samjhe the vo sāhil par utāreñge hameñ

Daal dī naav bhañvar meñ nā-ḳhudā kahne ko haiñ

fāsloñ se kam na hoñge ruuh ke rishte kabhī

vo hamesha dil meñ haiñ dil se judā kahne ko haiñ

munfarid un kī mohabbat munfarid un kī vafā

dūriyāñ rakhte haiñ phir bhī ham-navā kahne ko haiñ

un kī ik abrū kī jumbish bhī suḳhan-var hai bahut

hai zabāñ bhī un ke muñh meñ mudda'ā kahne ko haiñ

dūsroñ ko rāsta dikhlā.eñge vo kis tarah

rāh-e-gum-karda haiñ ḳhud aur rahnumā kahne ko haiñ

ho ga.ī hai āgahī un se 'sabīha' is qadar

jaan letī huuñ maiñ itnā ab vo kyā kahne ko haiñ

kaam hai un ka jafa wo ba-wafa kahne ko hain

dete hain jo dard-e-dil ahl-e-shifa kahne ko hain

hum to samjhe the wo sahil par utarenge hamein

Dal di naw bhanwar mein na-KHuda kahne ko hain

faslon se kam na honge ruh ke rishte kabhi

wo hamesha dil mein hain dil se juda kahne ko hain

munfarid un ki mohabbat munfarid un ki wafa

duriyan rakhte hain phir bhi ham-nawa kahne ko hain

un ki ek abru ki jumbish bhi suKHan-war hai bahut

hai zaban bhi un ke munh mein mudda'a kahne ko hain

dusron ko rasta dikhlaenge wo kis tarah

rah-e-gum-karda hain KHud aur rahnuma kahne ko hain

ho gai hai aagahi un se 'sabiha' is qadar

jaan leti hun main itna ab wo kya kahne ko hain