kaam kuchh aa na saki rasm-e-shanasai bhi

kaam kuchh aa na sakī rasm-e-shanāsā.ī bhī

shāmil-e-bazm thī shāyad mirī tanhā.ī bhī

kaash tū apnī talab meñ kabhī pahuñche mujh tak

terā hī aa.ina hai chashm-e-tamāshā.ī bhī

sahl mat samjho mire shauq kī nākāmī ko

muft miltī hai kahīñ izzat-e-rusvā.ī bhī

chashm-e-be-ḳhvāb meñ hai ḳhvāb kī sūrat ik shaḳhs

ḳhud se ġhāfil bhī hai aur mahv-e-ḳhud-ārā.ī bhī

ḳhair maiñ to isī qābil thā magar ye to batā

zindagī kyā tū kisī ko kabhī raas aa.ī bhī

kaam kuchh aa na saki rasm-e-shanasai bhi

shamil-e-bazm thi shayad meri tanhai bhi

kash tu apni talab mein kabhi pahunche mujh tak

tera hi aaina hai chashm-e-tamashai bhi

sahl mat samjho mere shauq ki nakaami ko

muft milti hai kahin izzat-e-ruswai bhi

chashm-e-be-KHwab mein hai KHwab ki surat ek shaKHs

KHud se ghafil bhi hai aur mahw-e-KHud-arai bhi

KHair main to isi qabil tha magar ye to bata

zindagi kya tu kisi ko kabhi ras aai bhi