kaam kuchh to mera lahu aaya

kaam kuchh to mirā lahū aayā

baaġh meñ mausam-e-numū aayā

hijr meñ tere mujh pe kyā guzrī

aaj tak pūchhne na tū aayā

jis tarah maiñ ne tujh ko yaad kiyā

yaad yuuñ kab kisī ko tū aayā

terā kūcha hai yā koī maqtal

jo bhī aayā lahū lahū aayā

maiñ usī kī tarah milā us se

aa.ina ban ke rū-ba-rū aayā

ḳhatm daur-e-ḳhayāl-o-ḳhvāb huā

lamha-e-tark-e-ārzū aayā

rāste der tak rahe raushan

duur tak mere saath tū aayā

yaad aa.ī kisī kī phir 'ḳhāvar'

dil se āñkhoñ meñ phir lahū aayā

kaam kuchh to mera lahu aaya

bagh mein mausam-e-numu aaya

hijr mein tere mujh pe kya guzri

aaj tak puchhne na tu aaya

jis tarah main ne tujh ko yaad kiya

yaad yun kab kisi ko tu aaya

tera kucha hai ya koi maqtal

jo bhi aaya lahu lahu aaya

main usi ki tarah mila us se

aaina ban ke ru-ba-ru aaya

KHatm daur-e-KHayal-o-KHwab hua

lamha-e-tark-e-arzu aaya

raste der tak rahe raushan

dur tak mere sath tu aaya

yaad aai kisi ki phir 'KHawar'

dil se aankhon mein phir lahu aaya