kaam ye bhi naya kare koi

kaam ye bhī nayā kare koī

ḳhud ko ḳhud se judā kare koī

jism kī qaid meñ huuñ barsoñ se

mujh ko mujh se rihā kare koī

dekhiye hausla charāġhoñ kā

un kī zid hai havā kare koī

mere kāñdhe pe rakh ke sar apnā

merī ġhazleñ sunā kare koī

sab kā hogā bhalā bhalā.ī se

kyoñ kisī kā burā kare koī

aag hī aag hai jise dekho

paanī paanī huā kare koī

aa ke mahfil meñ chuum le mujh ko

kaash aisī ḳhatā kare koī

chāhe patthar hoñ saare ik jaise

kaise sab ko ḳhudā kare koī

zaḳhm to de rahe ho dhartī ko

kaash is kī davā kare koī

chāñd tāroñ ko khojne vaalo

aadmī kā pata kare koī

saarī duniyā meñ dahshateñ bhar ke

yā-ḳhudā yā-ḳhudā kare koī

jurm lagtī hai sab ko ḳhāmoshī

kuchh na bole to kyā kare koī

mere ḳhat phaaḌ ke jalā Daalo

mujh se ye iltijā kare koī

kaam ye bhi naya kare koi

KHud ko KHud se juda kare koi

jism ki qaid mein hun barson se

mujh ko mujh se riha kare koi

dekhiye hausla charaghon ka

un ki zid hai hawa kare koi

mere kandhe pe rakh ke sar apna

meri ghazlen suna kare koi

sab ka hoga bhala bhalai se

kyon kisi ka bura kare koi

aag hi aag hai jise dekho

pani pani hua kare koi

aa ke mahfil mein chum le mujh ko

kash aisi KHata kare koi

chahe patthar hon sare ek jaise

kaise sab ko KHuda kare koi

zaKHm to de rahe ho dharti ko

kash is ki dawa kare koi

chand taron ko khojne walo

aadmi ka pata kare koi

sari duniya mein dahshaten bhar ke

ya-KHuda ya-KHuda kare koi

jurm lagti hai sab ko KHamoshi

kuchh na bole to kya kare koi

mere KHat phaD ke jala Dalo

mujh se ye iltija kare koi