kanon ko hai bhai hui taqrir kisi ki

kānoñ ko hai bhaa.ī huī taqrīr kisī kī

āñkhoñ meñ samā.ī huī tasvīr kisī kī

kuchh 'ishq meñ chaltī nahīñ tadbīr kisī kī

sar phoḌ jo rah jaa.e hai taqdīr kisī kī

har zarre meñ hai jalva har ik qatre meñ hai aab

hai arsh pe chhā.ī huī tanvīr kisī kī

andāz butoñ ke nahīñ aate haiñ nazar meñ

rahtī hai nigāhoñ meñ jo tasvīr kisī kī

ḳhat paḌh ke kahīñ aur bigaḌ baiThe na yārab

yaad aa.ī hai abrū dam-e-tahrīr kisī kī

ye girya-o-zārī dil-e-betāb kahāñ tak

rusvā kahīñ ho jaa.e na taqsīr kisī kī

ik muntazir-e-dīd kī pathrā ga.iiñ āñkheñ

tāḳhīr kisī kī huī tā'zīr kisī kī

maiñ faḳhr se kahtā huuñ mujhe tum se hai ulfat

baḌhtī hai tire naam se tauqīr kisī kī

ruḳh pher magar sar na hile dekh ki zālim

aTkī hai tirī zulf meñ taqdīr kisī kī

mehmāñ hai koī din ke, chale jā.eñge 'rahbar'

baiTheñge nahīñ daab ke jāgīr kisī kī

kanon ko hai bhai hui taqrir kisi ki

aankhon mein samai hui taswir kisi ki

kuchh 'ishq mein chalti nahin tadbir kisi ki

sar phoD jo rah jae hai taqdir kisi ki

har zarre mein hai jalwa har ek qatre mein hai aab

hai arsh pe chhai hui tanwir kisi ki

andaz buton ke nahin aate hain nazar mein

rahti hai nigahon mein jo taswir kisi ki

KHat paDh ke kahin aur bigaD baiThe na yarab

yaad aai hai abru dam-e-tahrir kisi ki

ye girya-o-zari dil-e-betab kahan tak

ruswa kahin ho jae na taqsir kisi ki

ek muntazir-e-did ki pathra gain aankhen

taKHir kisi ki hui ta'zir kisi ki

main faKHr se kahta hun mujhe tum se hai ulfat

baDhti hai tere nam se tauqir kisi ki

ruKH pher magar sar na hile dekh ki zalim

aTki hai teri zulf mein taqdir kisi ki

mehman hai koi din ke, chale jaenge 'rahbar'

baiThenge nahin dab ke jagir kisi ki