kanpte honTon se jab bhi wo dua karta hai

kāñpte hoñToñ se jab bhī vo duā kartā hai

lafz-e-āmīn har ik zarra kahā kartā hai

har sitāre meñ charāġhāñ kā samāñ hai jaise

kaun ḳhvāboñ ke jazīroñ meñ rahā kartā hai

kitne afsāne sunā detī hai vo ek nazar

dil to ma.asūm hai chup-chāp sunā kartā hai

tum ye batlāo shab-o-roz guzāre kaise

hijr meñ chāñd to āvāra phirā kartā hai

ham ko mālūm hai guzre hue mausam kā pata

terī yādoñ ke ḳhayābāñ meñ rahā kartā hai

shaam aatī hai jalātī huī tāroñ ke charāġh

aur usī vaqt diyā dil kā bujhā kartā hai

dil kī dīvār meñ dukh kā koī rauzan hī nahīñ

pattharoñ kī tarah insān jiyā kartā hai

dil ke jazbāt dabā.e nahīñ dabte 'zahrā'

chaḌhtā dariyā kahīñ roke se rukā kartā hai

kanpte honTon se jab bhi wo dua karta hai

lafz-e-amin har ek zarra kaha karta hai

har sitare mein charaghan ka saman hai jaise

kaun KHwabon ke jaziron mein raha karta hai

kitne afsane suna deti hai wo ek nazar

dil to masum hai chup-chap suna karta hai

tum ye batlao shab-o-roz guzare kaise

hijr mein chand to aawara phira karta hai

hum ko malum hai guzre hue mausam ka pata

teri yaadon ke KHayaban mein raha karta hai

sham aati hai jalati hui taron ke charagh

aur usi waqt diya dil ka bujha karta hai

dil ki diwar mein dukh ka koi rauzan hi nahin

pattharon ki tarah insan jiya karta hai

dil ke jazbaat dabae nahin dabte 'zahra'

chaDhta dariya kahin roke se ruka karta hai