kanTon ko chum le na koi iztirab mein

kāñToñ ko chuum le na koī iztirāb meñ

rakh dī hai kis ne aap kī ḳhushbū gulāb meñ

mahkā rahā hai aaj bhī mere vajūd ko

rakkhā thā ik gulāb jo tū ne kitāb meñ

thā kis kī āstīn pe maqtūl kā lahū

likkhā gayā hai qatl ye kis ke hisāb meñ

phirtā huuñ laash kāñdhoñ pe apnī liye hue

sadme uThā.e maiñ ne vo ahd-e-shabāb meñ

pūchhā tabīb se jo ġham-e-ishq kā ilaaj

likkhā hai us ne ishq-e-mukarrar javāb meñ

paḌtī haiñ jis taraf ye girātī haiñ bijliyāñ

rakhiye nigāheñ apnī ḳhudārā naqāb meñ

dastak pe un kī raat achānak maiñ chauñk uThā

pūchhā jo maiñ ne kaun vo bole janāb maiñ

shāyad ġham-e-hayāt kī talḳhī miTā sakeñ

piine lagā huuñ ashk milā kar sharāb meñ

hamrāh ishq bhī hai ġham-e-zīst bhī 'fahīm'

maiñ mubtalā huuñ in dinoñ duhre azaab meñ

kanTon ko chum le na koi iztirab mein

rakh di hai kis ne aap ki KHushbu gulab mein

mahka raha hai aaj bhi mere wajud ko

rakkha tha ek gulab jo tu ne kitab mein

tha kis ki aastin pe maqtul ka lahu

likkha gaya hai qatl ye kis ke hisab mein

phirta hun lash kandhon pe apni liye hue

sadme uThae main ne wo ahd-e-shabab mein

puchha tabib se jo gham-e-ishq ka ilaj

likkha hai us ne ishq-e-mukarrar jawab mein

paDti hain jis taraf ye giraati hain bijliyan

rakhiye nigahen apni KHudara naqab mein

dastak pe un ki raat achanak main chaunk uTha

puchha jo main ne kaun wo bole janab main

shayad gham-e-hayat ki talKHi miTa saken

pine laga hun ashk mila kar sharab mein

hamrah ishq bhi hai gham-e-zist bhi 'fahim'

main mubtala hun in dinon duhre azab mein