kash aisa ho wo milne ke bahane aae

kaash aisā ho vo milne ke bahāne aa.e

kuchh sune merī to kuchh apnī sunāne aa.e

us ko dekhe hue ik 'arsa huā hai mujh ko

aa.e vo pyaas hī āñkhoñ kī bujhāne aa.e

dekhnā chāhūñgī jī bhar ke use kah do zarā

us se kah do ki mujhe sirf satāne aa.e

ruuTh saktī huuñ kahāñ us se mohabbat hai mujhe

aur agar ruuTh ga.ī mujh ko manāne aa.e

merā dīvāna thā vo us kā yahī thā dā'vā

us kī dīvāngī kaisī hai batāne aa.e

maiñ ne kaaTī haiñ bahut hijr meñ us kī rāteñ

us ne bhī kaaTī haiñ gar rāteñ sunāne aa.e

kaun qismat se 'munavvar' kabhī laḌ saktā hai

aa.e vo dekhe mirī haar rulāne aa.e

kash aisa ho wo milne ke bahane aae

kuchh sune meri to kuchh apni sunane aae

us ko dekhe hue ek 'arsa hua hai mujh ko

aae wo pyas hi aankhon ki bujhane aae

dekhna chahungi ji bhar ke use kah do zara

us se kah do ki mujhe sirf satane aae

ruTh sakti hun kahan us se mohabbat hai mujhe

aur agar ruTh gai mujh ko manane aae

mera diwana tha wo us ka yahi tha da'wa

us ki diwangi kaisi hai batane aae

main ne kaTi hain bahut hijr mein us ki raaten

us ne bhi kaTi hain gar raaten sunane aae

kaun qismat se 'munawwar' kabhi laD sakta hai

aae wo dekhe meri haar rulane aae