kasni rang ke KHwabon se nikal aai hun

kāsnī rañg ke ḳhvāboñ se nikal aa.ī huuñ

mīThe paanī ke sarāboñ se nikal aa.ī huuñ

tū ne jaate hue ik baar bhī dekhā na use

vo jo kahtī thī azāboñ se nikal aa.ī huuñ

barguzīda thī tahajjud bhī na chhoḌā kartī

aur ab saare hisāboñ se nikal aa.ī huuñ

aas thī diid kī jo kaasa liye phirtī thī

maiñ javānī ke azāboñ se nikal aa.ī huuñ

mere atrāf meñ sab log bahut achchhe haiñ

dekh maiñ saare ḳharāboñ se nikal aa.ī huuñ

shab-ba-shab jaag ke paḌhtī huuñ risāle dil ke

ab maiñ bachpan kī kitāboñ se nikal aa.ī huuñ

haath meñ chūḌī nahīñ paaoñ meñ pāzeb nahīñ

ishq-zādī thī gulāboñ se nikal aa.ī huuñ

kasni rang ke KHwabon se nikal aai hun

miThe pani ke sarabon se nikal aai hun

tu ne jate hue ek bar bhi dekha na use

wo jo kahti thi azabon se nikal aai hun

barguzida thi tahajjud bhi na chhoDa karti

aur ab sare hisabon se nikal aai hun

aas thi did ki jo kasa liye phirti thi

main jawani ke azabon se nikal aai hun

mere atraf mein sab log bahut achchhe hain

dekh main sare KHarabon se nikal aai hun

shab-ba-shab jag ke paDhti hun risale dil ke

ab main bachpan ki kitabon se nikal aai hun

hath mein chuDi nahin paon mein pazeb nahin

ishq-zadi thi gulabon se nikal aai hun