kaTh ki laDkiyan bana li hain

kaaTh kī laḌkiyāñ banā lī haiñ

maiñ ne kaTh-putliyāñ banā lī haiñ

naam us kā likhā hai kāġhaz par

kārgar uñgliyāñ banā lī haiñ

āñdhiyo tum gunāh kar Daalo

phuus kī jhuggiyāñ banā lī haiñ

in ko mere nasīb meñ likh do

chāñd sī roTiyāñ banā lī haiñ

nayyar to laao badliyo jā kar

taal meñ machhliyāñ banā lī haiñ

ghar meñ taaza havā.eñ ā.eñgī

zehan meñ khiḌkiyāñ banā lī haiñ

ab ḳhizāñ ko salām bhejūñgā

shāḳhoñ par pattiyāñ banā lī haiñ

merī bātoñ meñ kuchh asar de do

hoñToñ par surḳhiyāñ banā lī haiñ

dil ko bahlā rahā huuñ 'sājid'-jī

mom kī titliyāñ banā lī haiñ

kaTh ki laDkiyan bana li hain

main ne kaTh-putliyan bana li hain

nam us ka likha hai kaghaz par

kargar ungliyan bana li hain

aandhiyo tum gunah kar Dalo

phus ki jhuggiyan bana li hain

in ko mere nasib mein likh do

chand si roTiyan bana li hain

nayyar to lao badliyo ja kar

tal mein machhliyan bana li hain

ghar mein taza hawaen aaengi

zehan mein khiDkiyan bana li hain

ab KHizan ko salam bhejunga

shaKHon par pattiyan bana li hain

meri baaton mein kuchh asar de do

honTon par surKHiyan bana li hain

dil ko bahla raha hun 'sajid'-ji

mom ki titliyan bana li hain