kaTi hai umr subh-e-tamanna ke KHwab mein

kaaTī hai umr sub.h-e-tamannā ke ḳhvāb meñ

rāteñ basar huī haiñ magar iztirāb meñ

jalvoñ kī vo taḌap kā hai aalam naqāb meñ

jaise ki barq kauñd rahī ho sahāb meñ

qurbān jā.iye sitam-e-rozgār ke

vo dekhnā paḌā jo na dekhā thā ḳhvāb meñ

kab tak raheñgī shām-e-alam kī navāzisheñ

tāroñ se pūchhnā hai sahar ke javāb meñ

kyoñ aaj hādsāt ke uThte nahīñ qadam

ye kaun aa gayā hai rah-e-inqalāb meñ

haañ aap hī se raunaq-e-bazm-e-ḳhayāl hai

haañ aap hī ko ham ne pukārā thā ḳhvāb meñ

biite dinoñ kī yaad bhulāne ke vāste

piinā paḌā hai ḳhūn-e-tamannā sharāb meñ

larzāñ thā kā.enāt kā dil jin se ai 'kamāl'

vo dhaḌkaneñ likhī ga.iiñ mere hisāb meñ

kaTi hai umr subh-e-tamanna ke KHwab mein

raaten basar hui hain magar iztirab mein

jalwon ki wo taDap ka hai aalam naqab mein

jaise ki barq kaund rahi ho sahab mein

qurban jaiye sitam-e-rozgar ke

wo dekhna paDa jo na dekha tha KHwab mein

kab tak rahengi sham-e-alam ki nawazishen

taron se puchhna hai sahar ke jawab mein

kyon aaj hadsat ke uThte nahin qadam

ye kaun aa gaya hai rah-e-inqalab mein

han aap hi se raunaq-e-bazm-e-KHayal hai

han aap hi ko hum ne pukara tha KHwab mein

bite dinon ki yaad bhulane ke waste

pina paDa hai KHun-e-tamanna sharab mein

larzan tha kaenat ka dil jin se ai 'kamal'

wo dhaDkanen likhi gain mere hisab mein