kawish-e-ishq pe inam agar ho jae

kāvish-e-'ishq pe in'ām agar ho jaa.e

sāmnā tujh se sar-e-'ām agar ho jaa.e

har ghaḌī saañs ke chalne se hai siine meñ dukhan

is meñ kuchh vaqfa-e-ārām agar ho jaa.e

dil kī be-vaj.h sī ranjish kā mudāvā to nahīñ

phir bhī milne kī koī shaam agar ho jaa.e

jis ne murjhā ke bikharnā hai numū se pahle

us kī ḳhushbū kā koī naam agar ho jaa.e

khil uTheñ qaht-zada aañkh meñ ashkoñ ke kañval

mausam-e-sabr kā itmām agar ho jaa.e

phir kisī harf-e-nasīhat kī kahāñ hai hājat

ruuh pe karb kā ilhām agar ho jaa.e

ab kahānī meñ sunāne ko bachā hī kyā hai

behtarī is meñ hai anjām agar ho jaa.e

kawish-e-'ishq pe in'am agar ho jae

samna tujh se sar-e-'am agar ho jae

har ghaDi sans ke chalne se hai sine mein dukhan

is mein kuchh waqfa-e-aram agar ho jae

dil ki be-wajh si ranjish ka mudawa to nahin

phir bhi milne ki koi sham agar ho jae

jis ne murjha ke bikharna hai numu se pahle

us ki KHushbu ka koi nam agar ho jae

khil uThen qaht-zada aankh mein ashkon ke kanwal

mausam-e-sabr ka itmam agar ho jae

phir kisi harf-e-nasihat ki kahan hai hajat

ruh pe karb ka ilham agar ho jae

ab kahani mein sunane ko bacha hi kya hai

behtari is mein hai anjam agar ho jae