kawish-e-rozgar ne umr-e-rawan ko kha liya

kāvish-e-rozgār ne umr-e-ravāñ ko khā liyā

dasht-e-sukūt ne mire zamzama-ḳhvāñ ko khā liyā

haa.e vo sub.h-e-bebasī haa.e vo shām-e-be-kasī

sā.at-e-bad ne is dafa āzurdagāñ ko khā liyā

tazkire rah ga.e faqat vo bhī haiñ kitnī der tak

tū ne sukūt-e-bekarāñ harf-o-bayāñ ko khā liyā

kāsa-e-vaqt meñ koī sikka-e-roz-o-shab kahāñ

bād-e-fanā ne ḳhatra-e-sūd-o-ziyāñ ko khā liyā

hastī-e-ḳhush-gumāñ sañbhal soch-samajh ke chaal chal

ālam-e-nīst ne har ik nām-o-nishāñ ko khā liyā

ḳhema-e-vasl jal ga.e ham-rahī rah badal ga.e

aur shab-e-firāq ne qalb-e-tapāñ ko khā liyā

kawish-e-rozgar ne umr-e-rawan ko kha liya

dasht-e-sukut ne mere zamzama-KHwan ko kha liya

hae wo subh-e-bebasi hae wo sham-e-be-kasi

saat-e-bad ne is dafa aazurdagan ko kha liya

tazkire rah gae faqat wo bhi hain kitni der tak

tu ne sukut-e-bekaran harf-o-bayan ko kha liya

kasa-e-waqt mein koi sikka-e-roz-o-shab kahan

baad-e-fana ne KHatra-e-sud-o-ziyan ko kha liya

hasti-e-KHush-guman sanbhal soch-samajh ke chaal chal

aalam-e-nist ne har ek nam-o-nishan ko kha liya

KHema-e-wasl jal gae ham-rahi rah badal gae

aur shab-e-firaq ne qalb-e-tapan ko kha liya