kab haq-parast zahid-e-jannat-parast hai

kab haq-parast zāhid-e-jannat-parast hai

hūroñ pe mar rahā hai ye shahvat-parast hai

dil saaf ho to chāhiye ma.anī-parast ho

ā.īna ḳhaak saaf hai sūrat-parast hai

darvesh hai vahī jo riyāzat meñ chust ho

tārik nahīñ faqīr bhī rāhat-parast hai

juz zulf sūjhtā nahīñ ai murġh-e-dil tujhe

ḳhuffāsh tū nahīñ hai ki zulmat-parast hai

daulat kī rakh na mār-e-sar-e-gañj se umiid

muuzī vo degā kyā ki jo daulat-parast hai

anqā ne gum kiyā hai nishāñ naam ke liye

gum-gashta kaun kahtā hai shohrat-parast hai

ye 'zauq' mai-parast hai yā hai sanam-parast

kuchh hai balā se lek mohabbat-parast hai

kab haq-parast zahid-e-jannat-parast hai

huron pe mar raha hai ye shahwat-parast hai

dil saf ho to chahiye mani-parast ho

aaina KHak saf hai surat-parast hai

darwesh hai wahi jo riyazat mein chust ho

tarik nahin faqir bhi rahat-parast hai

juz zulf sujhta nahin ai murgh-e-dil tujhe

KHuffash tu nahin hai ki zulmat-parast hai

daulat ki rakh na mar-e-sar-e-ganj se umid

muzi wo dega kya ki jo daulat-parast hai

anqa ne gum kiya hai nishan nam ke liye

gum-gashta kaun kahta hai shohrat-parast hai

ye 'zauq' mai-parast hai ya hai sanam-parast

kuchh hai bala se lek mohabbat-parast hai