kab ek maqam pe rukti hai sar-phiri hai hawa

kab ik maqām pe ruktī hai sar-phirī hai havā

tamām shahr o bayābāñ ko chhāntī hai havā

nasīb-e-pā-e-junūñ hai sadā kī dar-badrī

havā-e-jāda-o-manzil meñ kab chalī hai havā

ye pech-o-tāb hai kaisā sabab nahīñ khultā

banā banā ke bagūle bigāḌtī hai havā

sivā.e ḳhaak na kuchh haath aaj tak aayā

sarāb ret se sahrā meñ chhāntī hai havā

ġhazab kā ġhaiz o ġhazab thā jo ham na bikhre the

bikhar ga.e haiñ to kaisī Darī khaḌī hai havā

ukhāḌ toḌ ke bastī ke sab makānoñ ko

chhipī khañDar meñ pashīmān ro rahī hai havā

vo ek baat jo ḳhud se bhī ham na kahte the

zabāñ zabāñ pe vahī baat dhar ga.ī hai havā

tamām laala o gul ke charāġh raushan haiñ

shajar shajar pe shagūfoñ meñ jal rahī hai havā

kab apnā haath pahuñchtā gulāb tak 'bilqīs'

mire nasīb se shāḳhoñ meñ jā phañsī hai havā

kab ek maqam pe rukti hai sar-phiri hai hawa

tamam shahr o bayaban ko chhanti hai hawa

nasib-e-pa-e-junun hai sada ki dar-badri

hawa-e-jada-o-manzil mein kab chali hai hawa

ye pech-o-tab hai kaisa sabab nahin khulta

bana bana ke bagule bigaDti hai hawa

siwae KHak na kuchh hath aaj tak aaya

sarab ret se sahra mein chhanti hai hawa

ghazab ka ghaiz o ghazab tha jo hum na bikhre the

bikhar gae hain to kaisi Dari khaDi hai hawa

ukhaD toD ke basti ke sab makanon ko

chhipi khanDar mein pashiman ro rahi hai hawa

wo ek baat jo KHud se bhi hum na kahte the

zaban zaban pe wahi baat dhar gai hai hawa

tamam lala o gul ke charagh raushan hain

shajar shajar pe shagufon mein jal rahi hai hawa

kab apna hath pahunchta gulab tak 'bilqis'

mere nasib se shaKHon mein ja phansi hai hawa